Ekologııa mınıstri Temirtaýdyń ekologııalyq ınspektorymen kezdesti

NUR-SULTAN. QazAqparat - Ekologııa, geologııa jáne tabıǵı resýrstar mınıstri Maǵzum Myrzaǵalıev Qaraǵandy oblysynyń Temirtaý qalasy boıynsha memlekettik ekologııalyq ınspektory Abylaı Qabdyrashty qabyldady, dep habarlaıdy QazAqparat vedomstvonyń saıtyna silteme jasap.

Jas mamanǵa óńirdegi ekologııalyq problemalar men qorshaǵan ortaǵa qatysty quqyqbuzýshylyqtar týraly málimetterdi jedel jetkizip otyrý qajettigin aıtty.

«Temirtaýdyń halqy, qoǵam ókilderi óte belsendi. Sol halyqpen, BAQ-pen jumys isteý kerek. «Arselor Mıttal» sııaqty iri kásiporyndarmen tyǵyz baılanysta bolyp, jumystaryn qadaǵalaýy kerek. Sondyqtan bul óte jaýapty jumys», - dedi mınıstr kezdesýde.
Aıta keteıik, Qazaqstanda buryn jekelegen qalalarda ekologııalyq ınspektor qyzmeti bolmaǵan. Temirtaýda bul qajettilik qalanyń nashar ekologııalyq jaǵdaıy áserinen týyndap otyr. 2020 jyly Temirtaý qalasynyń ekologııalyq problemalaryn keshendi sheshý boıynsha Jol kartasy qabyldanǵan. Aýaǵa lastaýshy zattardy negizgi shyǵarýshy - «ArselorMıttal Temirtaý» AQ shyǵaryndylardy azaıtý boıynsha 23 is-shara atqarýy tıis. Sonymen birge qalada 500 myń aǵash otyrǵyzý týraly kelisim jasalǵan.