Ekologııa mınıstri: Paıdalanýǵa jaraıtyn sý kóleminiń azaıý qaýpi bar

NUR-SULTAN. QazAqparat – Jańa tehnologııalar egistikterdi sýarý kezinde 33 paıyzǵa deıin sýdy únemdeýge múmkindik beredi. Bul týraly Úkimet otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Sý sharýashylyǵy balansyndaǵy aýyl sharýashylyǵynyń úlesi 67 paıyzdy quraıtyndyǵy belgili. Jalpy alǵanda, biz sýdyń tapshylyǵy bar elderdiń qataryndamyz. Sonymen qosa, paıdalanýǵa bolady degen sý kóleminiń azaıý qaýpi tur. Osy oraıda sýarmaly jerlerdiń kólemin ulǵaıtý tek sý únemdeıtin tehnologııalardy engizý esebinen ǵana múmkin. Naqty aıtsaq, sýarý kezinde osyny qoldaný qajet», - dedi mınıstr.

Onyń sózine qaraǵanda, naqty alqaptyń ózinde sý shyǵynyn azaıtýǵa qol jetkizý qajet.

«Tamshylatyp, jańbyrlatyp sýarý jáne jerdi josparlaýdyń jańa tehnologııalary sııaqty sýarýdyń túrleri sý tutynýdy dástúrli sýarýmen salystyrǵanda 33 paıyzǵa deıin azaıtýǵa múmkindik beredi. Biraq eń bastysy, sýdyń áleýetti ónimdiligi artady, ıaǵnı 1 sharshy metr jumsalǵan sýǵa ónimniń shyǵýy 2,5 ese artady. Sondaı-aq qolda bar táýekelder jaǵdaıynda ylǵal shyǵyny az jáne neǵurlym rentabeldi bolyp, aýyl sharýashylyǵy daqyldaryn ártaraptandyrýdy júrgizý qajet», - dedi M. Myrzaǵalıev.

Budan buryn habarlanǵandaı, qazirgi ýaqytta Qazaqstanda 1,5 mln gektar sýarmaly jer bar. Olardyń basym bóligi ońtústik oblystarǵa tıesili. Ótken jyly sol jerlerdi sýarý úshin 12,3 mlrd teshe metr sý jumsaldy. Bul elimiz boıynsha tutynatyn sýdyń 67 paıyzyn quraıdy.

Sonymen qatar mınıstr qaı óńirlerdegi egis alqaptarynda sý tapshylyǵy bolýy múmkin ekenin aıtty. «Bıylǵy vegetatsııalyq kezeńge daıyndyq máselesi de mańyzdy bolyp otyr. 2020 jylǵa arnalǵan gıdrologııalyq boljamǵa sáıkes, elimizdiń ońtústik jáne batys aımaqtarynda sý az bolýy múmkin. Osyǵan oraı biz tıisti sharalar qabyldadyq. Sý qoımalarynyń jumys kesteleri qaıta qaralyp, ázirlendi», - dedi M. Myrzaǵalıev.