Ekologııa mınıstri ózen sýlaryn paıdalaný kórsetkishin aıtty
NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev ózen aǵynynyń resýrstary jaıynda aıtyp berdi, dep habarlaıdy QazAqparat tilshisi.
«Sońǵy jyldary ózen aǵynynyń naqty resýrstary jylyna 90-100 tekshe shaqyrymdy qurady. Onyń 51-ge jýyq tekshe shaqyrymy – jergilikti aǵyn, al qalǵany Qytaıdan, Ortalyq Azııa elderinen jáne Reseıden transshekaralyq ózender arqyly kelip túsedi. Halyqtyń jáne ekonomıka salalarynyń qajettilikteri úshin paıdalanylatyn sýdyń jalpy kólemi shamamen 25 tekshe shaqyrymdy quraıdy. Onyń ishinde aýyl sharýashylyǵyna – 15 tekshe shaqyrym , ónerkásipke – 6 tekshe shaqyrym jáne kommýnaldyq sharýashylyqqa bir tekshe shaqyrym tıesili. Al tasymaldaý kezindegi shyǵyndar úsh tekshe shaqyrymdy quraıdy. Sonymen qatar, ekologııalyq júıelerdi qoldaý úshin shamamen 50 tekshe shaqyrym qajet», - dedi mınıstr Úkimet otyrysynda.
Onyń aıtýynsha, sońǵy úsh jylda Qazaqstan sý az tsıkline kirdi. 2019 jyly ózen aǵysynyń jalpy kólemi 83 tekshe shaqyrymdy qurady. Bul ortasha kóp jyldyq kórsetkishten jıyrma paıyzǵa az.
«Aıta ketý kerek, respýblıka boıynsha paıdalanylatyn sýdyń 97% ońtústiktegi tórt oblysqa tıesili. Respýblıka boıynsha paıdalanylǵan sýdyń naqty kólemi 13,3 tekshe shaqyrymdy qurady. Bul 2019 jylmen salystyrǵanda 1 km3 artyq», - dedi Myrzaǵalıev.
