Ekologııa mınıstri Óskemende aýany lastaý deńgeıin tómendetý jumystarymen tanysty
ÓSKEMEN. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev jumys saparymen Shyǵys Qazaqstan oblysyna keldi. Ol aldymen «Óskemen JES» JShS-ine bardy, dep habarlaıdy QazAqparat atalmysh vedomostvonyń Telegram-kanalyna silteme jasap.
Mınıstr kásiporynnyń atmosferalyq aýany lastaý deńgeıin tómendetý boıynsha júrgizip jatqan jumystarymen tanysty. Jylý elektr ortalyǵy 2014 jyldan bastap óndiriske eń ozyq qoljetimdi tehnologııalardy engizgen. Nátıjesinde aýaǵa shyǵatyn qatty bólshekter 51,3%-ǵa, kúkirt dıoksıdi 17%-ǵa tómendegen. 2003-2019 jyldar aralyǵynda Óskemen JES-iniń ekologııalyq sharalarǵa bólgen qarjysy 7,6 mlrd teńgeden asty.
Ekologııa mınıstri JES-tiń jumys tehnologııasyn odan jasyldandyra túsý qajettigin aıtty.
«Óskemen qalasynda negizgi eki lastaýshy kásiporyn bar. Biri - «Qaztsınk» kompanııasy, ekinshisi jylý elektr ortalyǵy. Ásirese qysta, jelsiz aýa raıynda lastaýshy zattyń kóp bóligi JES-tan shyǵady. Shyǵaryndylar 16 myń tonnaǵa deıin jetedi. Degenmen jasyl tehnologııa boıynsha úlken jumys istelgeni kórinip tur. Shyǵaryndylar kólemin taǵy da azaıta túsý maqsatynda qosymsha baǵdarlama ázirleý qajet. Qysqa ýaqyt ishinde halyq onyń nátıjesin sezinýi tıis»,- dedi Ekologııa mınıstri.
Ári qaraı ekologııalyq ahýaldyń nasharlaýyn boldyrmas úshin qoldanystaǵy qazandyq agregattaryn jańartyp, tazalaý qurylǵylaryn tolyǵymen aýystyrý josparyn jasaý qajettigin atap ótti. Qazirgi ýaqytta kásiporynnyń óndiris alańynda nóser aǵyndylaryn tazalaý boıynsha qurylǵylar ornatylǵan. Al 2016 jyldan bastap Úlbi ózenine túsetin nóser aǵyndylary toqtatyldy.
Maǵzum Myrzaǵalıev jumys sapary barysynda «Kaztsınk», Úlbi metallýrgııalyq zaýyttaryna, balyq sharýashylyǵy mekemelerine barýdy josparlap otyr.
