Ekologııa mınıstri Mańǵystaýdaǵy qýańshylyq jóninde pikir bildirdi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev Mańǵystaý oblysyndaǵy qýańshylyq máselesi jóninde pikir bildirdi, dep habarlaıdy QazAqparat tilshisi.

«Jalpy, qazir klımattyq ózgerister baıqalýda. Ony bárimiz kórip te júrmiz. Negizi elimizdiń sý balansyn qarasaq, 90-10 tekshe kılometrdi quraıdy, sonyń 50 paıyzǵa jýyǵy syrttan keledi. Ortalyq Azııa bar, Reseı bar, Qytaı bar. Sondyqtan biz syrttaǵy kórshilerimizge táýeldimiz. Jalpy Mańǵystaý oblysynyń sý tapshylyǵy burynnan bar, jasyryn emes, shóleıt dala. Sondyqtan ondaı jaǵdaılar baıqalady», - dedi M. Myrzaǵalıev «Kerýen» saýda ortalyǵynda bótelkelerdi qaıta óńdeýge qabyldaıtyn «Fandobox ecoplatform» avtomatynyń tanystyrylymynda.

Onyń aıtýynsha, qazirgi ýaqytta ekologter osyndaı máselelerdi zerttep jatyr.

«Jalpy, sýdyń yqtımal jetispeýshiligi máseleleri, árıne, týyndap jatty. Biz jasaı alatyn eń mańyzdy nárse – sýdy tutynýdy azaıtý boıynsha jumys isteý. Óıtkeni klımattyq ózgerister júrip jatyr, olardy toqtatý múmkin emes. Jaı ǵana olardyń teris áserin azaıtýǵa bolady», - deıdi Ekologııa mınıstri.

Aıta keteıik, sońǵy jyldary Mańǵystaý oblysynda qurǵaqshylyq kúsheıip, bul sharýa qojalyqtaryna qatty áser etip jatyr. Jaýyn-shashynyń bolmaýy, tasymaldanatyn azyqtyń jetispeýi, aımaqtaǵy aptap ystyq malǵa kútim jasaýǵa keri áserin tıgizip otyr.