Ekologııa mınıstri qazaqstandyqtardy «Jer saǵaty» aktsııasyna qatysýǵa shaqyrdy

NUR-SULTAN. QazAqparat - 27 naýryzda ǵalamshar turǵyndary Búkilálemdik jabaıy tabıǵat qory bastamashy bolǵan «Jer saǵaty» aýqymdy aktsııasyna qatysady. Qazaqstan da bul sharaǵa kezekti ret atsalysady. QR Ekologııa, geologııa jáne tabıǵı resýrstar mınıstri Maǵzum Myrzaǵalıev óz Twitter paraqshasynda qazaqstandyqtardy osy ekologııalyq naýqanǵa belsendi qatysýǵa shaqyrdy.

« Búgin Qazaqstan dástúrli túrde álemdegi eń aýqymdy «Jer saǵaty» ekologııalyq aktsııasyna qatysady. Bul kúni 180 eldiń mıllıondaǵan turǵyndary 1 saǵatqa jaryq pen elektr qurylǵylaryn sóndiredi. Aktsııanyń negizgi maqsaty – adamzatty tabıǵatqa janashyrlyq tanytýǵa, ǵalamshar klımaty men onyń shekteýli resýrstaryn saqtaý úshin sharalar qabyldaýǵa shaqyrý. Qazaqstanda «Jer saǵaty» aktsııasy jyl ótken saıyn tanymal bolyp keledi. Eger buryn naýqandy tek iri qalalar qoldasa, sońǵy eki jyl qatarynan barlyq óńirler qosylyp jatyr «,- dep jazdy mınıstr.

Maǵzum Myrzaǵalıevtiń oıynsha, aktsııa álem halqyn ekologııalyq problemalardy sheshý jolynda biriktiredi.
« Bıyl Búkilálemdik jabaıy tabıǵat qory «Jer saǵaty» aktsııasyn ekologııalyq ashyqtyq taqyrybyna arnady. Ekologııalyq problemalarǵa beı-jaı qaramaıtyn barlyq azamatty osy álemdik naýqanǵa qatysýǵa shaqyramyn. Jergilikti ýaqyt boıynsha 20:30-da bir saǵatqa jaryqty sóndirý kerek. Bul bar ǵalamnyń ekologııany qorǵaý men saqtaý jolynda birigýine zor serpin beredi dep senem «,- deıdi vedomstvo basshysy.
Aıta keteıik, aktsııaǵa Ekologııa, geologııa jáne tabıǵı resýrstar mınıstrligi, Qazaqstannyń ekologııalyq uıymdarynyń qaýymdastyǵy, «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ, «Jasyl» ekonomıka jáne G-Global-dy damytý koalıtsııasy» ZTB, «QazExpoCongress» ulttyq kompanııasy» aktsıonerlik qoǵamy, «Eco Fund Tabigat» qoǵamdyq qory men ákimdikter qatysady. Jergilikti ýaqyt boıynsha 20:30-da elordada Aqorda, Máńgilik El monýmenti , Áziret sultan meshitteri sekildi nysandardyń dekoratıvti jaryǵy óshiriledi. Eıfel munarasy, Bıg Ben, Kolızeı sııaqty álemniń tanymal sáýlet eskertkishteriniń de jaryǵy 1 saǵatqa sónedi.