Ekologııa mınıstri qatty turmystyq qaldyqtardyń kólemin 42 fýtbol alańyna teńedi

NUR-SULTAN. QazAqparat –QR Ekologııa, geologııa jáne tabıǵı resýrstar mınıstri Maǵzum Myrzaǵalıev qatty turmystyq qaldyqtardy qaıta óńdeýdiń josparymen bólisti, dep habarlaıdy QazAqparat tilshisi.

«Eldegi iri problema qatty turmystyq qaldyqtardy qaıta óńdeýdiń tómendigi men olardy bólek jınaý ári suryptaý boıynsha tıisti ınfraqurylymnyń bolmaýyna baılanysty. Sondyqtan jańa Ekokodekstiń baǵyttarynyń biri - ol «Óndiris jáne tutyný qaldyqtaryn basqarýdy jetildirý» bolyp otyr. Qazirgi ýaqytta elimizdiń 3,5 myń polıgonynda

120 mln tonnadan astam turmystyq qatty qaldyqtar jınaqtalǵan jáne jyl saıyn 5 mln tonnadan astam turmystyq qaldyqtar jınalady. Salystyratyn bolsaq, kólemi boıynsha 42 fýtbol alańyna teń», - dedi mınıstr Májiliste jańa Ekologııalyq kodeks jobasyn tanystyra otyryp.

Onyń sózine qaraǵanda, 2016 jyldan bastap turmystyq qaldyqtardy óńdeý

2,6 paıyzdan 14,9 paıyzǵa deıin ósken. Alaıda bul kórsetkish jetkiliksiz.

«Jınalǵan turmystyq qatty qaldyqtardyń kólemin qysqartý úshin «Waste to Energy» tetigin engizý usynylady. Osy oraıda qaldyqtardy jaǵý eskerilgen, ıaǵnı budan elektr energııasyn ala otyryp, ony jelige taratý qarastyrylyp otyr. Bul tetik Eýropada ózin jaqsy kórsetti», - dep túsindirdi Myrzaǵalıev.

Onyń aıtýynsha, «Waste to Energy» tetigin engizýdiń nátıjesinde qoqys óńdeý jáne jeke ınvestorlardyń qarajatyn tartý máselesi sheshiletin bolady.

«Bul 2025 jylǵa deıin qaldyqtar kólemin 30 paıyzǵa qysqartýǵa jáne 180 mlrd teńgeden astam ınvestıtsııa tartýǵa múmkindik beredi. Mysaly, Eýropa elderindegi 150-ge jýyq zaýyt osyndaı mehanızm boıynsha jumys isteıdi», - dedi vedomstvo basshysy.

Sóz sońynda ol eýropalyq dırektıvalarǵa uqsas, shyǵaryndylarǵa qoıylatyn talaptardy saqtaý boıynsha qatań shekteýlerdi engizý josparlanýda.