Ekologııa mınıstri Qambash kóli men Kókaral bógetiniń jaǵdaıymen tanysty

QYZYLORDA. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev Qyzylorda oblysyna jumys sapary barysynda Qambash kóli men Kókaral bógetiniń jaǵdaıymen tanysty, dep habarlaıdy QazAqparat.

Vedomstvo baspasóz qyzmetiniń málimetinshe, Syrdarııa ózeni ortalyq atyraýynyń oń jaǵalaýyn alyp jatqan Qamystybas júıesiniń ekologııalyq jáne halyq sharýashylyqtyq máni zor. Sýdyń az bolýy kezeńi saldarynan Syrdarııa ózeni basseıni sońǵy 2 jyl boıy «qorektenbegen». Sol sebepti kóldiń tek jartysy ǵana tolyp, sý jaǵalaýdan 200-300 metrge alystap ketti.

Maǵzum Myrzaǵalıev pen oblys ákimi Gúlshara Ábdiqalyqova jergilikti halyqpen, mamandarmen kezdesip, sý problemasyna qatysty usynystardy tyńdady.
«Sý sharýashylyǵyna qatysty jaǵdaı qıyn. Shuǵyl sharalar qabyldaý qajet. Syrdarııa ózeniniń Amanótkel aýyly mańynda sý torabyn salý máselesin qaraý kerek. Bul Qamystybaı jáne Aqshataý kól júıelerindegi sý deńgeıin ustap, toltyryp otyrýǵa múmkindik beredi», - dep atap ótti mınıstr.

Sonymen birge mınıstr Kókaral bógetin de tekserdi. Qazirgi ýaqytta bógettiń buzylǵan 135 metr jerin qalypqa keltirý úshin jobalyq-smetalyq qujat daıyndalyp jatyr, onyń ári qaraı buzylmaýynyń aldyn alý sharalary da jasalady. Joba Kókaral bógetin saqtap qalýǵa, osylaısha 27 mlrd tekshe metr sýymen Kishi Aral teńizin de ustap turýǵa múmkindik beredi.
«Sońǵy jyldary Syrdarııa ózenindegi sýdyń azaıýy óńirdiń aýylsharýashylyq salasyna aıtarlyqtaı qıyndyq keltirýde. Oblystyń negizgi sharýashylyǵy sýdy kóp qajet etetin kúrish egisi ekenin jaqsy bilesizder. Alaıda biz jyldan jylǵa kúrish egisiniń kólemin azaıtyp, aýylsharýashylyq salasyn ártaraptandyrýdy bastadyq. Osylaısha sýdy únemdeýdiń joldaryn qarastyryp jatyrmyz»,- dedi oblys ákimi Gúlshara Ábdiqalyqova.