Ekologııa mınıstri eldegi sý problemalaryn kóterdi

NUR-SULTAN. QazAqparat - Ekologııa, geologııa jáne tabıǵı resýrstar mınıstri Maǵzum Myrzaǵalıev aldaǵy ýaqytta eldi sýmen qamtamasyz etýde kezdesýi múmkin negizgi problemalardy atady, dep habarlaıdy QazAqparat tilshisi.

«Qazirgi ýaqytta eldegi sýmen qamtamasyz etý jaǵdaıy ekonomıka salalary men halyqtyń talaptaryn qanaǵattandyryp otyr. Alaıda sý salasynyń mynadaı negizgi túıtkilderin atap ótýge bolady. Birinshiden – ózen aǵynynyń qulaýy men sýdy tutyný kóleminiń ósýi saldarynan orta jáne uzaq merzimdi kezeńde eldi sýmen qamtamasyz etýdiń boljamy tómendeýde. Ekinshiden - arnalardyń jáne ırrıgatsııalyq júıelerdiń syndarly tozýy saldarynan tasymaldaý kezindegi sýdyń joǵary shyǵyny. Atap aıtqanda, aýyl sharýashylyǵynda shyǵyndar 50%-ǵa deıin jetedi. Olardy qysqartý úshin arnalardy jóndeý men sý resýrstaryn avtomatty basqarýdy engizý talap etiledi. Kelesi - ınfraqurylymǵa tartylatyn ınvestıtsııalardyń jáne bilikti kadrlardyń jetispeýshiligi», - dedi Maǵzum Myrzaǵalıev OKQ ótken halyqqa esep berý kezdesýinde.

Osyǵan baılanysty, mınıstrliktiń aldynda 2030 jyly qosymsha jer ústi sý resýrstaryn ulǵaıtý esebinen 100 shaqyrym deńgeıinde sý balansyn saqtaý, sýarmaly jerlerdi 1,4-ten 3,0 mln ga-ǵa deıin ulǵaıtý úshin jańa ırrıgatsııalyq júıelerdi salý, sý sharýashylyǵy ınfraqurylymyn jańǵyrtý jáne qaıta jańartý, sý salasyn tsıfrlandyrý, sý únemdeý mindetteri tur.

«Jerdi sýlandyrý boıynsha kelesi jumystar atqaryldy. 2019 jyly 66 myń ga alqapta sý sharýashylyǵy ınfraqurylymy qalpyna keltirildi. Sondaı-aq, elimizdiń 5 óńirinde (Almaty, Jambyl, Túrkistan, Qyzylorda jáne Aqtóbe oblystary) sýarmaly jerlerdiń shamamen 0,5 mln ga (492 myń ga) sýmen qamtamasyz etilýin arttyrý jáne qalpyna keltirý boıynsha tıisti jobalar iske asyrylýda. Qaryz jáne bıýdjet qarajaty esebinen qarjylandyrýdyń jalpy somasy - 274 mlrd teńge. Jalpy 3 jyl ishinde biz 6,7 myń shaqyrymnan astam arnalar, 4 sý qoımasy, 4 sý toraby, 239 tik drenaj uńǵymasy jáne 23 myń ózge de sý sharýashylyǵy qurylystaryn qaıta jańǵyrtatyn bolamyz», - dedi ol.

Mınıstrdiń aıtýynsha, osynyń arqasynda 88 myń jumys orny, onyń ishinde qurylys kezeńinde 11 myń jumys orny ashylatynyn aıtady. Qalpyna keltirilgen sýarmaly jerlerdi aınalymǵa engizý aýylda 77 myń turaqty jumys ornyn ashýǵa yqpal etpek.