Ekologııa mınıstri balyq ónimin eksporttaýǵa bolatyn naryqtardy atady

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev qazaqstandyq balyq ónimin eksporttaýǵa bolatyn naryqtardy atady, dep habarlaıdy QazAqparat tilshisi.

«Bizdiń janymyzda eksport úshin aıtarlyqtaı áleýetti naryqtar bar. Atap aıtqanda, Reseı men Qytaıda balyq ónimderine suranys joǵary deńgeıde. Bul eki eldegi bizben shekaralas aýdandarynyń naryǵy 3 mln tonnaǵa deıin jetedi», - dedi mınıstr Úkimet otyrysynda.

Onyń sózine qaraǵanda, elimizdegi sý resýrstaryn eskere otyryp, ósirilgen balyq kólemin 600 myń tonnaǵa deıin arttyrý áleýeti bar.

«Eksport kólemin 10 esege ulǵaıtýǵa balyq sharýashylyǵynyń áleýeti jetkilikti ekenin aıta ketý kerek. Bul, shamamen 100 myń jumys ornyn qurýǵa jáne halyqtyń tabysyn kóbine aýyldyq jerlerde arttyrýǵa yqpal etetin bolady. Mınıstrlik ishki jáne syrtqy naryqty qazaqstandyq balyq ónimimen qamtamasyz etý boıynsha júıeli jumysty jalǵastyrady», - dedi Myrzaǵalıev.