Ekologııa mınıstri Qarmet kompanııasyna jumys saparymen keldi
TEMІRTAÝ. KAZINFORM — Qarmet kompanııasyna Qazaqstan Respýblıkasynyń Ekologııa jáne tabıǵı resýrstar mınıstri Erlan Nysanbaev jumys saparymen keldi. Sapar barysynda ótken birlesken keńeste taraptar ózara yntymaqtastyqtyń qazirgi jaǵdaıy men keleshegi, ekologııalyq jobalardy iske asyrý jáne óndiristik qýattardy kezeń-kezeńimen jańǵyrtý máselelerin jan-jaqty talqylady.
Kezdesý memleket pen iri ónerkásiptik kásiporyn arasyndaǵy ekologııalyq jaýapkershilik pen tehnologııalyq damýdyń ózara baılanysyn aıqyndaǵan mańyzdy alań boldy.
Keńes barysynda Qarmet basshylyǵy óndiristi jańartý baǵytynda júzege asyrylyp jatqan aýqymdy baǵdarlamanyń negizgi nátıjeleri men josparlaryn tanystyrdy. Kompanııada júrip jatqan júıeli ózgeristerdiń ózegi retinde ekologııalyq bastamalardy kúsheıtý, energııa tıimdiligin arttyrý jáne zamanaýı tehnologııalyq sheshimderdi engizý kórsetildi. Basshylyqtyń aıtýynsha, bul sharalar óndiristik protsesterdiń turaqtylyǵyn qamtamasyz etip qana qoımaı, qorshaǵan ortaǵa túsetin áserdi barynsha azaıtýǵa baǵyttalǵan.
Sapar aıasynda mınıstr kásiporyndy jańǵyrtýdyń negizgi jobalarynyń biri — № 8-9 kokstyq batareıalar qurylysy alańyn aralady. Qazirgi ýaqytta salynyp jatqan jańa qýattar eskirgen agregattardyń ornyn basýǵa arnalǵan. Joba tolyq iske qosylǵan jaǵdaıda jylyna 1,5 mln tonnaǵa deıin qurǵaq koks óndirý múmkindigi qalyptasady. Bul tek óndiristik qýatty arttyryp qana qoımaı, metallýrgııalyq tizbektiń turaqtylyǵyn kúsheıtip, koks-hımııa óndirisiniń ekologııalyq tıimdiligin jańa deńgeıge kóterýge múmkindik beredi.
Sonymen qatar Erlan Nysanbaev 2025 jyly tabıǵı gazǵa tolyq qosylǵan № 3 domna peshiniń jumysymen tanysty. Domna óndirisin gazdandyrý nátıjesinde mazýtty qoldaný aıtarlyqtaı qysqaryp, tehnologııalyq protsesterdiń turaqtylyǵy artqan. Budan bólek, koks tutyný kólemi azaıyp, óndiristiń jalpy ekologııalyq kórsetkishteri jaqsarǵany atap ótildi. Bul qadam kásiporynnyń kómirtek izin tómendetýge baǵyttalǵan mańyzdy sheshimderdiń biri retinde baǵalanyp otyr.
Mınıstr sondaı-aq ystyq myryshtaý jáne alıýmındeý tsehyna baryp, óndiristik ýchaskeniń tehnıkalyq múmkindikterimen jáne shyǵarylatyn ónim túrlerimen tanysty. Bul baǵyttaǵy jumystar kásiporynnyń ártaraptandyrylǵan óndiristik qurylymyn damytýǵa jáne ishki naryqpen qatar eksporttyq áleýetin arttyrýǵa múmkindik beredi.
Qarmet ókilderi ekologııalyq kún tártibi kompanııa strategııasynyń ajyramas bóligi ekenin erekshe atap ótti. Óndiristik nysandardy kezeń-kezeńimen jańǵyrtý, negizgi agregattardy gazdandyrý, koks-hımııa óndirisin tolyqtaı jańartý jáne jańa tehnologııalardy engizý uzaq merzimdi tıimdilikti arttyrýǵa baǵyttalǵan. Sonymen birge bul sharalar ónerkásiptik qaýipsizdikti kúsheıtip, ekologııalyq turaqtylyqty qamtamasyz etýdi kózdeıdi.
Sapar barysynda taraptar ekologııalyq kórsetkishterdi jaqsartý, óndiristik protsesterdi tsıfrlandyrý jáne aldaǵy birlesken jobalardy iske asyrý baǵyttaryn da talqylady. Mınıstrlik pen kásiporyn arasyndaǵy dıalogtyń jalǵasýy ekologııalyq saıasattyń tıimdiligin arttyrýǵa jáne ónerkásiptik sektordaǵy jańǵyrtý qarqynyn jedeldetýge yqpal etetini aıtyldy.
Jalpy, jumys sapary Qarmet kásipornynda júrgizilip jatqan jańǵyrtý protsesiniń júıeli sıpatqa ıe ekenin jáne ekologııalyq basymdyqtardyń óndiristik damý strategııasymen tyǵyz ıntegratsııalanǵanyn kórsetti.
