Ekologııa mınıstri Leonardo Dı Kaprıoǵa buqtyrylǵan kıik etin joldaı ma
ASTANA. KAZINFORM — Taıaýda tanymal amerıkalyq akter, Gollıvýd juldyzy Leonardo Dı Kaprıo kıik popýlıatsııasynyń qalpyna kelýine baılanysty Qazaqstanǵa úndeý jasaǵan edi. Ol Úkimetti quttyqtap, birlesken kúsh-jiger arqyly tabıǵat qorǵaý salasynda shynaıy tabysqa qol jetkizýdiń jarqyn mysaly bolǵanymyzdy atap ótti. Osyǵan oraı jýrnalıster Ekologııa jáne tabıǵı resýrstar mınıstri Erlan Nysanbaevtyń pikirin bilgen edi.
«Belgili akter Leonardo Dı Kaprıo Qazaqstan Úkimetine kıik sanyn kóbeıtkeni úshin alǵys aıtty. Biraq jaǵdaı ol oılaǵandaı birjaqty emes ekeni belgili. Osyǵan baılanysty siz mınıstr retinde óz atyńyzdan Dı Kaprıoǵa kıik etinen jasalǵan konservi jibermeısiz be?» dep surady jýrnalıster Úkimet otyrysynan keıin ótken brıfıngide.
«Bir ǵana tanymal Gollıvýd akteri Dı Kaprıo emes, halyqaralyq uıymdar da 21 myń bas kıikti kóbeıtip, 2 mıllıonǵa jýyq ósirgenimiz úshin alǵys hat joldap jatyr. Sonymen birge halyqaralyq uıymdar máseleniń ekinshi jaǵyn qabyldap otyr. Kıik sanyn retteý kerektigin de, álemde mundaı tájirıbe bar ekenin de túsinip otyr», — dedi mınıstr.
Erlan Nysanbaev kıik sanynyń tabıǵı rettelý qubylysyn buzǵan adam ekenin eske saldy.
«Taǵy da aıtam, kıik sanynyń tabıǵı rettelý qubylysyn buzǵan ózimiz kinálimiz. Endi búgin qoldan retteýge májbúrmiz. Óıtkeni aýyl sharýashylyǵyna shyǵyn keltirip jatyr. Konservige kelsek, bir jerde satylyp jatsa, ózim satyp alyp, dámin kórem. Shyn máninde ol týraly oılamappyn da», — dedi ol.
