Ekologııa mınıstri kólikti 5 mınýttan artyq qyzdyrmaý týraly: Qos qoldap qoldaımyn

ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev kólikti 5 mınýttan astam qyzdyrýdyń ekologııaǵa zııany týraly pikir bildirdi.

— Bul negizi Іshki ister mınıstrliginiń taqyryby ǵoı. Jalpy biz, árıne, qoldaımyz. Bul norma jalpy zańda bar, buryn paıdalanylǵan joq. Ereje 20 jyldan astam ýaqyt bar. Árıne, eldi mekenderdiń ekologııalyq jaǵdaıyn túzeý úshin bostan-bos qyzyp turǵan máshıneni tártipke keltirý máselesin qoldaımyz, — dedi ol. Úkimet otyrysynan keıin ótken baspasóz máslıhatynda.

Onyń paıymdaýynsha, atalǵan norma aıyppul arqyly bıýdjet túsimin toltyrý úshin qoldanysqa enip otyrǵan joq.

— Al búgingi bolyp jatqan jaǵdaı aıyppul salyp, bıýdjetke túsimdi kóbeıtýdiń máselesi emes. Jalpy biz máselelerdi jan-jaqty qarastyryp jatyrmyz. Mysaly, Almaty qalasynyń kire beristerinde 19 ekologııalyq post qoıdyq. Astana men Almatynyń ózinde ǵana 600-700 myńdaı tirkelgen bolsa, kúnine kiretin máshıneniń sany 400 myńnan astam. Sonyń bári ekologııalyq turǵydan qaraǵanda qozǵaltqyshy bostan-bosqa sóndirilmegen máshıne, árıne, qorshaǵan ortany lastaýǵa úles qosady. Sol sebepten biz ony eki qolmen qoldaımyz, — dedi mınıstr.

Eske salsaq, Májilis depýtaty Serik Erýbaev qatty aıazdy kúnderi avtokólikti jylytýǵa 5 mınýttan kóp ýaqyt ketetinin aıtyp, aıyppul salý normasyn qaıta qaraýdy usynǵan bolatyn.