Ekologııa mınıstri «qyshqyldy jańbyr» jóninde: Qazaqstanda ondaı qaýip joq
ASTANA. KAZINFORM — Irannan Ortalyq Azııa elderine «qyshqyldy bulttar» jetýi múmkin degen aqparat shyndyqqa janaspaıdy. Bul týraly Ekologııa jáne tabıǵı resýrstar mınıstri Erlan Nysanbaev málim etti.
— «Qazgıdromet» málimetine qaraǵanda, mundaı qubylys bolýy múmkin emes. «Qyshqyldy jańbyr» ol kúkirt dıoksıdi men azot totyǵynyń taralýynan bolady. Jalpy, onyń bólshekteri alysqa tarala qoımaıdy. Sonymen qatar Ózbekstandaǵy áriptesterimiz de rastaǵandaı, «qyshqyldy jaýynnyń» Ortalyq Azııada taralýy qaýpi joq, — dedi Erlan Nysanbaev Parlament Májilisinde tilshiler suraǵyna jaýap bere otyryp.
Buǵan deıin habarlanǵandaı, jalǵan aqparatqa qarsy is-qımyl ortalyǵy áleýmettik jelilerde, sondaı-aq keıbir qazaqstandyq jáne sheteldik BAQ-da Iran aýmaǵynda Ortalyq Azııa elderine jetýi múmkin «qyshqyl bulttar» paıda bolǵany týraly aqparattyń taralýyn tirkedi.
Osyǵan baılanysty «Qazgıdromet» mundaı málimdemelerdiń ǵylymı derektermen jáne baqylaý nátıjelerimen rastalmaǵanyn habarlady.
