Ekologııa mınıstri dalada tań asyrǵan kóligin 5 mınýt ishinde qalaı qyzdyrǵanyn kórsetti

ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev seısenbi kúngi baspasóz máslıhatynda jýrnalısterge bergen ýádesin oryndap, túni boıy dalada turǵan kóligin tańerteń 5 mınýttyń ishinde qalaı qyzdyrǵanyn kórsetti.

— Qaıyrly tań! Mine bastadyq, motor múldem sýyq, qatyp tur. Búgin túnde «-17» gradýs (aýa temperatýrasy — red) boldy. Bul jóninde ınternetten biraz maǵlumat qaradym. Ol jerde ár túrli pikir bar. Biraq jalpy kólik qozǵaltqyshynyń temperatýrasy 50 gradýs bolǵanda qozǵalýǵa bolady deıtin pikir basym bolyp shyqty, — dep bastalady mınıstr túsirgen vıdeo.

Mınıstrliktiń baspasóz qyzmeti bergen málimetke súıensek, vıdeodaǵy kóliktiń markasy — Hyundai Palisade.

— Mınıstr memlekettik qyzmetke qaıta kelgennen beri qyzmettik kólikpen júredi. Al osy eksperıment úshin otbasylyq kólikpen vıdeoǵa túsken. Tolyq jetekti, avtomat qorapty, 2022 jyly shyǵarylǵan avtomobıl, — dep túsindirdi baspasóz qyzmetindegiler.

Eske salsaq, Ekologııa jáne tabıǵı resýrstar mınıstri Erlan Nysanbaev kólikti uzaq qyzdyrýdyń ekologııaǵa zııany týraly pikir bildirgen edi. 

Keıin tipti qystyń aıazynda da kólikti 5 mınýt ishinde qyzdyrýǵa bolatynyn dáleldeý úshin arnaıy vıdeo túsirýge ýáde bergen bolatyn.