Ekologııa kodeksiniń jobasy Májiliste maquldanyp, Senatqa joldandy
Májilis otyrysynda ekologııa máseleleri jáne tabıǵat paıdalaný komıtetiniń múshesi Mansurhan Mahambetov kodeks jobasynyń jańa redaktsııasy qorshaǵan ortany qorǵaý salasyndaǵy memlekettik retteý men basqarýdyń neǵurlym tıimdi jáne ashyq júıesin qurýǵa baǵyttalǵanyn málim etti.
Kodeks jobasy 28 qazanda birinshi oqylymda maquldanǵan.
«Ekinshi oqylymǵa daıyndyq barysynda depýtattar 98-bapty pysyqtady. Oǵan sáıkes I jáne II sanattaǵy obektiler - ruqsat berý rásimderi sheńberinde, al III sanattaǵy obektiler - ońaılatylǵan nysanda memlekettik ekologııalyq saraptamadan ótedi. Sondaı-aq III sanattaǵy obektilerge jatatyn mal sharýashylyǵy salasyndaǵy máselelerdi retteýdi ońaılatý boıynsha usynystar pysyqtaldy. Kodeks jobasyn talqylaý barysynda normalar pysyqtaldy. Olarǵa sáıkes Qazaqstan Respýblıkasynyń salyq zańnamasyna sáıkes biryńǵaı jer salyǵyn tóleýshilerge ákimshilendirýdi jeńildetý jáne jaqsartý maqsatynda áser etýge ekologııalyq ruqsat alýdyń qajeti joq», - dedi ol.
Sonymen qatar, depýtattar ekinshi oqylymǵa deıin eń úzdik qoljetimdi tehnıkalardyń neǵurlym qatań anyqtamalyqtaryn qabyldaý kezinde buryn berilgen keshendi ekologııalyq ruqsattardy qaıta qaraýǵa usynyp otyr.
«Ekologııalyq tıimdilikti arttyrý baǵdarlamasyn qaıta qaraý rásimin ashyqtyǵy úshin mindetti qoǵamdyq tyńdaýlar kózdelgen. Ken óndirý jáne metallýrgııa qyzmeti toqtap qalmaýy úshin osyndaı kásiporyndardyń burynnan jınaqtalyp qalǵan qaldyqtaryn ornalastyrýdy retteý úshin kodekstiń keıbir normalaryn qoldanýdy 2036 jylǵa deıin keıinge qaldyrý kózdelgen. Emıssııalar monıtorınginiń avtomattandyrylǵan júıesin engizý merzimderi boıynsha 2023 jylǵa deıin keıinge qaldyrý josparlanyp otyr», - dedi ol.
