Ekologııa kodeksi qaldyq óńdeý erejeleri turǵysynan qaıta jazylýy múmkin

ASTANA. KAZINFORM – Májilis depýtaty, palatanyń Ekologııa máseleleri jáne tabıǵat paıdalaný komıtetiniń tóraǵasy Edil Jańbyrshın Ekologııa jáne tabıǵı resýrstar mınıstrliginiń qaldyq óńdeý salasyndaǵy ishki erejeleriniń sapasyn synady. 

- Erejege qaıta óńdeý paıyzyn kórsetip qoıǵansyzdar. Ol paıyzdar «Jasyl ekonomıka» tujyrymdamasynan alynǵan. Ol jerde kommýnaldyq qaldyqtardy qaıta óńdeý 40 paıyz dep kórsetilgen. Endi qarańyz, kommýnaldyq qaldyqtardyń tańbasy ár túrli. Metall, qaǵaz-karton, áınek, plastık, kólik shınasy dep kete beredi. Negizi shına óndiristik qaldyq bolý kerek edi. Búkil álemde solaı, al sizderde kommýnaldyq qaldyq dep jazylǵan, - degen depýtat vedomstvo jumysynda paıdalanatyn tujyrymdamalardy oqýshynyń referatyna teńedi.

- Aǵash qaldyqtar, tamaq qaldyqtary, elektronıka men tekstıl qaldyqtary bar. Lampa, batareıalar sııaqty qaýipti qaldyqtar da bar. Álemde bul qaldyqtardy óńdeýdiń deńgeıi árqalaı. Mysaly, metall qaldyqtaryn óńdeý deńgeıi álemde orta eseppen 70 paıyz. Karton 60-75 paıyz, áınek 50-75 paıyz, plastık 10-35 paıyz, shına 40-60 paıyz, aǵash 20-40 paıyz, tamaq qaldyqtary 30 paıyzǵa deıin, elektronıka 20-25 paıyz, toqyma 10-20 paıyz, óńdeledi. Damyǵan elder qaýipti qaldyqtardy 30-60 paıyzǵa deıin óńdeıdi. Al sizder bárine ortaq 40 paıyzdy belgileı salǵansyzdar. Kıim-keshekti qaıta óńdep jatyr degenge kim senedi? Órtep jiberedi. Soǵan qaramaı 40 paıyz dep joǵary meje qoıǵansyzdar. Bárine birdeı talap qoıyp otyrsyzdar. Qaldyqtyń sıpatyna qarap saralaý degen joq, - dedi Edil Jańbyrshın.

Májilis depýtaty «Jasyl damý» kompanııasynyń ókilderi men mınıstrlik mamandary buǵan deıin aıtylǵan syndardan esh nátıje shyǵarmaǵanyn aıtady.

- Buǵan deıin osyndaı syn aıtqanbyz, oryndamaı otyrsyzdar. Astanadaǵy qaldyqtardyń 40 paıyzy – tamaq qaldyqtary. Polıgonǵa baryp, sonda jumys isteıtin joldastarmen sóılestim. Olar 45 paıyz qaldyq tamaqtan shyǵady dep otyr. Odan keıin suryptaý, qaıta óńdeý, kádege jaratý degen uǵymdar bar. Al sizderdiń erejelerińizde ondaı eshteńe joq.

Sizderge munyń bárin aıtqanbyz. Túzeýge ýáde bergensizder. Eshteńe istelmegen, Túıequs sııaqty tuıyqtalyp alǵansyzdar. Zańǵa ilespe aktiler deńgeıinde salany retteı almasańyzdar, biz muny zań deńgeıinde jasaımyz. Ekologııalyq kodekske túzetý engizip, bárin jazyp qoıamyz, - dedi ol.

Sondaı-aq, ol mınıstrlik pen «Jasy damý» ókilderin Prezıdent tapsyrmalaryna sabotaj jasap otyr dep aıyptady. 

- Importtaýshylar men óndirýshilerdiń tapsyratyn esepterin qabyldamaıdy ekensizder. «Jasyl damýǵa» beresizder, olar bir tehnıkalyq qorytyndysyn beredi, sol qorytyndy negizinde esepterdi qabyldamaısyzdar. Al adamdar zaýyt satyp alyp, qaıta óńdep jatyr ǵoı. Esepti qabyldamaý arqyly ýtıl alymnan bosatpaı otyrsyzdar. Sizder tolyǵymen Memleket basshysynyń, Májilistegi beıindi komıtettiń, depýtattardyń tapsyrmasyna sabotaj jasap otyrsyzdar. Adamdar óz aqshasyna satyp aldy ol zaýyttardy. Sizderdiń «Jasyl damýdan» bólgen 3 paıyzdyq aqshalyńyzǵa alǵan joq. Al sizder dóńgelep turǵan óndiristiń dóńgelegine taıaq tyǵyn áleksizder, - dedi Edil Jańbyrshın.

Buǵan deıin depýtattar qoqys óńdeý naryǵyna Qytaı ınvestorlary zańsyz jolmen kirmekshi dep alańdap otyrǵanyn jazǵan edik.