Ekologııa departamenti «Kaztsınk» zaýytyndaǵy jarylysqa qatysty túsinikteme berdi
ÓSKEMEN. QazAqparat – Shyǵys Qazaqstan oblystyq ekologııa departamenti qaladaǵy meteojaǵdaıdyń nasharlaýyna baılanysty túsinikteme berdi. Quzyrly organ málimetinshe, shahardaǵy ekologııalyq jaǵdaıǵa «Kaztsınk» zaýytyndaǵy jarylystyń qatysy joq, dep habarlaıdy QazAqparat tilshisi.
«15 qyrkúıekte «Kaztsınk» JShS Óskemen metallýrgııa kesheniniń qorǵasyn zaýytyndaǵy balqytý tsehynyń shahtalyq peshin tazartý boıynsha josparly jumystar júrgizilgen. Osy kezeńde jarylys bolyp, saldarynan bir qyzmetker kóz jumdy.
Jarylystan óndiristik úı-jaılar, jabdyqtar men jumys protsessine shyǵyn kelgen joq. 17 qyrkúıekten bastap qorǵasyn zaýytynyń negizgi tsehtary, al 19 qyrkúıekten «Isasmelt Rt» peshiniń jumysy toqtatyldy. Osyǵan baılanysty qaladaǵy meteorologııalyq jaǵdaıdyń nasharlaýy kúkirt tsehyndaǵy jarylystan boldy degen aqparat shyndyqqa janaspaıdy», - dep málim etti ekologııa departamentiniń baspasóz qyzmetinen.
Departament dereginshe, 17 qyrkúıekten bastap Óskemende ekinshi dárejeli qolaısyz meteojaǵdaı jarııalanǵan. Al QazAqparat tilshisiniń saýalyna jaýap bergen Shyǵys Qazaqstan oblysy boıynsha bas memlekettik ekologııalyq ınspektor Raýan Turarov aýanyń lastanýynyń naqty sebebi anyqtalatynyn málimdedi.
«Qazgıdromettiń» baqylaý pýnktisi usynǵan aqparat boıynsha 17 qyrkúıekte túste kúkir dıoksıdiniń mólsheri 0,2 bolǵan. Keıin shekti ruqsat etilgen kontsentratsııa kólemi – 1, al keshe ol kórsekish 3,2-ge deıin ósken. Buǵan neshetúrli sebep bolýy múmkin. Onyń biri – óndiristik zonadan lastaýshy zattardyń kelýi. Ekinshiden, baqylaý pýnktisiniń mańynda aýyr júk tehnıkasy jumys istegen bolýy múmkin. Bul jaǵdaı ekologııa departamentiniń nazarynda. Sebepteri anyqtalyp, qosymsha málimet usynylatyn bolady», - dedi ShQO-nyń bas memlekettik ekologııalyq ınspektory Raýan Turarov.
Eske salaıyq, buǵan deıin Óskemendegi zaýyttan shyǵyp jatqan sary tútin jurttyń úreıin týǵyzǵan bolatyn Atalǵan jaǵdaı boıynsha jergilikti ekologtar tekseris bastaǵan bolatyn.
Foto: yandex.kz
