Ekolog Qazaqstandaǵy klımattyq ózgeristerdiń zardaby qandaı bolatynyn aıtty
NUR-SULTAN. QazAqparat – «ECOJER» qaýymdastyǵynyń bas dırektory Rústem Qabjanov elimizdegi kútiletin klımattyq ózgerister týraly aıtty. Bul týraly QazAqparat uıymnyń baspasóz qyzmetine silteme jasap habarlaıdy.
«Sarapshylardyń baǵalaýynsha, Qazaqstandaǵy klımattyq ózgeristerdiń saldarynan jer shóleıttenip, bıologııalyq alýandyqqa nuqsan kelýi múmkin. Bul óz kezeginde áleýmettik-ekonomıkalyq damýǵa áser etip, basqa da jaǵymsyz áserlerge alyp keledi», - dedi Rústem Qabjanov elordada ótken áleýmettik jobalar forýmynda.
Tabıǵat janashyry 2016 jyly Qazaqstan Parıj kelisimin ratıfıkatsııalap, 2030 jylǵa qaraı parnıktik gaz shyǵaryndylaryn 1990 jylǵy deńgeıden 15%-ǵa qysqartýǵa mindetteme alǵanyn eske saldy.
«Parnıktik gaz shyǵaryndylarynyń negizgi úlesi energetıka salasyna tıesili. Barlyq shyǵaryndylardyń 40%-dan astamyn osy sala bóledi. Jylý jáne elektr energııasyn óndirý úshin kómir qoldanyp otyrmyz. Sońǵy jyldary jańartylatyn energııa kózderi belsendi damyǵany ras. Alaıda, 1990 jylǵa qaraǵanda parnıktik gazdardyń tómendeý úlesi áli de aıtarlyqtaı emes. Kerisinshe, 2013-2018 jyldar aralyǵynda shyǵaryndylar kólemi 27,8%-ǵa ósti», - dedi «ECOJER» basshysy.
Sarapshy damyǵan elderdiń kóbi kómirtegin tutyný kólemin azaıta otyryp damýdyń ulttyq strategııalaryn qabyldap jatqanyn atap ótti. Qazaqstan da solardan qalyspaı, 2050 jylǵa deıingi tujyrymdamany ázirleıtin jumys toby qurdy. Qujatta «jasyl ósim» jáne ulttyq ekonomıkany tereń karbonsyzdandyrý sharalaryn iske asyrý kózdelgen. Deı turǵanmen, búginge deıin elimizde «jasyl energetıkaǵa» engizdelgen ondaǵan joba iske asyryldy. Respýblıka boıynsha jalpy qýaty 1685 MVt bolatyn 116 jańartylatyn energııa kóziniń nysany jumys isteıdi. 2020 jyldyń qorytyndysy boıynsha «jasyl» energııa óndirisiniń kólemi saǵatyna 3,24 mlrd kVt bolyp, óndirilgen jalpy elektr energııasynyń 3%-yn quraǵan.
«Jasyl ekonomıkaǵa kóshý tujyrymdamasynyń 2020 jylǵy nysanaly ındıkatoryna qol jetkizilgenine qaramastan, parnıktik gazdardy tómendetýi tıis jańartylatyn energııa kózderiniń úlesi áli de mardymsyz», - dep túıindedi Rústem Qabjanov.
