Ekokompanııalar polıetılen paketke tyıym salýǵa qalaı qaraıdy
«Biz durys baǵytta kele jatyrmyz. Bul bastamamen kelisemiz. Sebebi, polıetılen paketter ekologııaǵa saldary aýyr zalal keltiredi», - dedi Áset Ahmadıev.
«Green TAL» JShS túrli nusqadaǵy ekosómke tigýmen aınalysady.
«Bizdiń uıym - áleýmettik joba, onyń negizgi bóligi - halyqtyń áleýmettik osal toptaryn jumyspen qamtý. Búginde kompanııamyzda 32 adam jumys isteıdi. Dálirek aıtqanda, múgedek adamdar, kópbalaly otbasylarǵa jatatyn jalǵyzbasty analar», - deıdi Áset Ahmadıev.
Sonymen qatar, kompanııa taza maqtadan jasalǵan sómkelerdi ǵana tigetinin atap ótti.
«Mysaly, túrli forýmdarǵa, baspahanalarǵa, uıymdarǵa sómkeler jasaımyz, sheteldik mıssııalardan tapsyrys kóp túsedi. Bizde ónimniń túri kóp. Sómke, arqa qorjyny, paket, jaǵajaı sómkelerin tigemiz. Sondaı-aq, balalardyń jıhazdaryn tek aǵashtan ǵana jasaımyz jáne ony gıpoallergendi boıaýmen, lakpen boıaımyz. Biz ekologııalyq taza ónimderge nazar aýdaramyz», - dedi Áset Ahmadıev.
Sonymen qatar, bolashaqta kompanııa kraft-qaǵazdan qaptama shyǵarýdy josparlap otyrǵanyn jetkizdi.
Esterińizge sala keteıik, jańa Ekologııalyq kodeks boıynsha elimizdiń aýmaǵynda bólshek saýdadaǵy polıetılen paketterdi satýdy kezeń-kezeńmen toqtatý máselesi qarastyrylyp jatyr.
