Ekoaktsııa: Almatyda 1200-den asa plastık qaqpaq qaıta óńdeýge tapsyryldy
ASTANA. KAZINFORM — Ekoaktsııaǵa shamamen 150 turǵyn qatysty. Sonyń nátıjesinde qaıta óńdeýge 1200-den astam plastık qaqpaq jınaldy, dep habarlaıdy qala ákimdiginiń baspasóz qyzmeti.
Almatyda «Eco Almaty» JShS-niń aqparattyq qoldaýymen júzege asyrylyp jatqan «Eko-Trak» jobasy jumysyn jalǵastyryp keledi. Joba qala turǵyndary arasynda ekologııalyq mádenıetti qalyptastyrýǵa jáne qaldyqty bólek jınaý tájirıbesin keńinen nasıhattaýǵa baǵyttalǵan.
Kezekti aýla ekoaktsııasy Mountain Drive turǵyn úı kesheninde ótti. Bul keshenniń turǵyndary ECO Network jáne «Eko-Hab» jobalarynyń negizin qalaýshy Evgenıı Mýhamedjanov uıymdastyrǵan ekologııalyq bastama aıasynda jeńimpaz atanǵan bolatyn.
Bıyl 16 mamyrda «Gúlder» turǵyn úı kesheninde ótken alǵashqy kóshpeli is-sharadan keıin almatylyqtarǵa aýlasynyń mekenjaıyn kórsetip, ótinim qaldyrý usynylǵan edi. Eń kóp ótinim dál Mountain Drive turǵyndarynan túskendikten, «Eko-Trak» osy turǵyn úı keshenine bardy.
Aktsııa barysynda turǵyndarǵa mobıldi ekologııalyq alań qyzmet kórsetti. Qatysýshylar bólek jınalǵan qaldyqtaryn qaıta óńdeýge tapsyryp, ekologııalyq taqyryptaǵy ınteraktıvti is-sharalarǵa qatysty. Sondaı-aq, olar plastık qaqpaqtardy usaqtaýǵa arnalǵan veloshrederlerdi paıdalaný múmkindigine ıe boldy.
— Ekoaktsııaǵa shamamen 150 turǵyn qatysty. Sonyń nátıjesinde qaıta óńdeýge 1200-den astam plastık qaqpaq jınaldy. Sonymen qatar qatysýshylar 10 kg makýlatýra, 5 kg plastık, 3 kg polıetılen jáne 1 kg shyny bótelke tapsyrdy. «Eko-Trak» — Almatydaǵy qaldyqtardy bólek qabyldaýdy aǵartýshylyq jáne ınteraktıvti baǵdarlamamen ushtastyratyn alǵashqy kóshpeli ekologııalyq zerthana. Mundaı format turǵyndardy qaldyqtarmen jaýapkershilikpen jumys isteý qaǵıdalarymen tanystyryp, ártúrli jastaǵy azamattardy ekologııalyq bastamalarǵa tartýǵa múmkindik beredi, — delingen habarlamada.
Osyndaı jobalardy júzege asyrý qaldyqtardy bólek jınaý mádenıetin damytýǵa, qala turǵyndarynyń ekologııalyq jaýapkershiligin arttyrýǵa jáne Almatyda qaldyqtardy turaqty basqarý júıesiniń damýyna yqpal etedi.
Buǵan deıin Almatyda ekologııalyq talaptardy buzǵan 200 kólik anyqtalǵanyn jazǵanbyz.
