Ekinshi ret «Qazaqstan barysy» atanýǵa bar kúshimdi salamyn — Erasyl Qajybaev

ASTANA. KAZINFORM — Qazaq kúresinen 2024 jylǵy «Qazaqstan barysynyń» chempıony Erasyl Qajybaev jeńisti jolyn jalǵastyrýǵa daıyn ekenin aıtty.

Sportshy Astana qalasyndaǵy «Damu Mall» saýda ortalyǵynda ótken salmaq ólsheý rásiminen keıin Kazinform tilshisiniń suraǵyna jaýap berip, bıylǵy týrnırdegi basty maqsatymen bólisti. 

— Daıyndyq jáne kóńil-kúı bári oıdaǵydaı. Eńbek etip, aıanbaı ter tóktik. Endi sonyń jemisin kóretin ýaqyt keldi. Basty maqsat — byltyrǵy jeńisti qaıtalaý. Sol úshin, erteń bar kúshimdi salyp, ónerimdi kórsetemin, — dedi Erasyl.

Sonymen qatar, ol bıylǵy týrnırdegi basty qarsylasyn atady.

— Basty qarsylas retinde osy týrnırge qatysqan barlyq 42 balýandy aıtar edim. Boz kilemde álsiz qarsylas joq, bári myqty. Jerebege túsken ár qarsylaspen jaqsy óner kórsetýge tyrysamyn. Basqa eshteńe oılamaımyn, — dedi dańqty balýan.

Aıta keteıik, Erasyl Qajybaev Abaı oblysy atynan óner kórsetedi. Salmaq ólsheý qortyndysy boıynsha ol tarazyda 151.4 kelini kórsetti.

Osyǵan deıin habarlaǵanymyzdaı, 14-shi márte alaýy tutanǵaly otyrǵan fınaldyq jarys 18 qazan kúni elorda tórindegi Jaqsylyq Úshkempirov atyndaǵy jekpe-jek saraıynda ótedi.