Ekinshi kezeń: Almatyda Mass Alert jer silkinisin eskertý júıesi synaqtan ótkiziledi

ALMATY. KAZINFORM - Almatyda 17 qazanda Mass Alert jedel qulaqtandyrý júıesi synaqtan ótkiziledi. Endi bul qulaqtandyrý iOS operatsııalyq júıesin paıdalanýshylarǵa da qoljetimdi bolady.

Mobıldi qurylǵy paıdalanýshylaryna «Ulttyq qulaqtandyrý» belgisimen synaq týraly habarlama jiberiledi, al keıbir Android operatsııalyq júıesi bar qurylǵylarǵa «Prezıdenttik qulaqtandyrý» belgisimen eskertý túsedi. Sebebi halyqaralyq sıpattamaǵa sáıkes, telefon óndirýshileriniń barlyǵy testtik nemese jedel qulaqtandyrýdy memlekettik organdar iske qosqanda, operatsııalyq júıelerinde osyndaı ataýlar qoldanady.

Almatylyqtar men qala qonaqtaryna alańdaýdyń qajeti joq, sebebi bul jaı ǵana synaqtan ótkizý.

Aıta ketý kerek, iPhone qurylǵylarynyń ıeleri iOS 18 baǵdarlamalyq jasaqtamasy bolsa ǵana eskertý alady.

Osyǵan baılanysty almatylyqtar men qala qonaqtaryna qurylǵylaryn iOS 18 júıesine jańartý qajet. Eger qurylǵy avtomatty túrde jańartylmasa, ony «Baptaýlar – Negizgi – Baǵdarlamalyq jasaqtamany jańartý» dep ózi jańartý kerek.

Esterińizge sala keteıik, bıyl 31 mamyrda birinshi kezeńde Android operatsııalyq júıesi bar qurylǵylarǵa synaqtan ótkizý júıesi júrgizildi.

Keıin jer silkinisin eskertetin júıe synaqtan ótip, almatylyqtar prezıdenttik habarlama aldy.

Ekinshi kezeńde - iOS qurylǵylarynyń paıdalanýshylary elektrondyq qulaqtandyrý júıesine qosylady.

Mass Alert júıesiniń SMS-ke qaraǵanda birqatar artyqshylyǵy bar. Habarlama mobıldi operator jelisine qosylǵan, sondaı-aq jeke tańdalǵan geografııalyq aımaqtaǵy barlyq abonentke keledi. Sonymen qatar, júıe jelilerdiń shamadan tys júktelý jaǵdaıynda jumys isteıdi. Cell Broadcast tehnologııasynyń basty artyqshylyǵy, qamtý aımaǵyndaǵy barlyq abonentti birden ári jappaı eskertedi.

Buǵan deıin Vıtse-premer Qanat Bozymbaev tótenshe jaǵdaı týyndaǵan sátte azamattardy ýaqtyly habardar etý maqsatynda Mass Alert júıesi 1 maýsymǵa deıin pılottyq rejımde engiziletinin aıtqan bolatyn.