Ekinshi deńgeıli bankterdiń qaıtarmaǵan qansha qaryzy bar – UB jaýaby
ASTANA. KAZINFORM – 2017-2020 jyldary ekinshi deńgeıli bankterge 700 mlrd teńge kóleminde qoldaý kórsetilgen bolatyn. Kazinform agenttigi Ulttyq bankke resmı saýal joldap, búgingi tańda bul qarjynyń qanshasy qaıtarylǵanyn anyqtady.
— Ulttyq Bank 2017 jáne 2020 jyldary «QR bank sektorynyń qarjylyq turaqtylyǵyn arttyrý» baǵdarlamasy aıasynda ekinshi deńgeıli birqatar bankke shamamen 700 mlrd teńge kóleminde sýbordınatsııalanǵan oblıgatsııalyq qaryz bóldi. Qarjylaı qoldaý «Eýrazııalyq Bank» AQ, «Jusan Bank» AQ (burynǵy «Tsesna Bank» AQ, «ATF Bank» AQ), «Bank TsentrKredıt» AQ, «Bank RBK» AQ jáne «Nurbank» AQ-ǵa kórsetildi, - delingen jaýapta.
Málimetke saı, bul baǵdarlama aıasynda Ulttyq qordyń qarajaty jumsalmaǵan. Baǵdarlama operatory — «Qazaqstannyń ornyqtylyq qory» AQ bankterdiń 15 jyldyq rettelgen oblıgatsııalaryn satyp alǵan. Qazirgi tańda bankterdiń mindettemelerin oryndaý merzimi bastalmaǵan.
— Memleket bankterdi memlekettik qarajatty merziminen buryn qaıtarýdy júzege asyrýǵa yntalandyrý jóninde sharalar qabyldady. Nátıjesinde Ulttyq Banktiń 49,6 mlrd teńge somasyndaǵy qarajaty qaıtaryldy. Atap aıtqanda «Bank TsentrKredıt» AQ 20 mlrd teńge jáne «Bank RBK» AQ 29,6 mlrd teńge qaryzdy merziminen buryn ótedi. Qazirgi tańda Ulttyq Bank aldynda ekinshi deńgeıli bankterdiń osy baǵdarlama aıasynda qalǵan qaryzy – 650,9 mlrd teńge, - delingen habarlamada.
Sondaı-aq Ulttyq bank memleket kómegin qaıtartý úshin naqty qandaı sharalar qarastyrylǵanyn málim etti.
— Atap aıtqanda, buǵan deıingi zańǵa ózgerister engizilip, memleketten qoldaý alǵan bankterge dıvıdend tóleýge shekteý qoıyldy. Bul sheshim jumsalǵan memleket qarajaty nátıjesin berýi úshin, bankterdiń qarjylyq turaqtylyǵyna jaǵdaı jasap, jaı-kúıin jaqsartýy úshin qabyldandy. Aktsıonerlerine dıvıdend tóleıtin bankterdi memleketten alǵan kómektiń bir bóligin merziminen buryn qaıtartýǵa mindetteıtin normatıvtik akt qabyldandy. Qazir Ulttyq Bank Qarjy naryǵyn retteý jáne damytý agenttigimen birlesip, bankterdi memleket qarjysyn merziminen buryn qaıtartýǵa yntalandyrýǵa baǵyttalǵan jańa retteý tetikterin ázirlep jatyr. Qarastyrylyp otyrǵan sharalardyń qatarynda bankterge (sonyń ishinde memlekettik qoldaý alǵan bankterge) mınımaldy rezerv talaptaryn qatańdatý da bar, - delingen jaýapta.
Eske sala ketsek, bıyl jyl basynda Úkimettiń keńeıtilgen otyrysynda Memleket basshysy Qasym-Jomart Toqaev keıbir bankter óz shyǵyndaryn áldeqashan ótese de, memlekettiń ıeligindegi qarjyny qaıtarýǵa asyqpaı otyrǵanyn, tipti ony joǵary paıyzben táýekeli az memlekettik qarjy quraldaryna salyp, kepildi tabys taýyp otyrǵanyn synǵa aldy. Úkimet pen Ulttyq bankke osy baılanysty shara qabyldaýdy tapsyrdy.