Ekinshi deńgeıli bankter dıhandarǵa jeńildetilgen nesıe beretin bolady
ASTANA. KAZINFORM – Bastamany iske asyrý úshin respýblıkalyq bıýdjetten 7,7 mlrd teńge kóleminde sýbsıdııa kózdelgen. Bul týraly AShM baspasóz qyzmeti habarlady.
Jyl basynda ótken Úkimettiń keńeıtilgen otyrysynda Memleket basshysy tıimsiz sýbsıdııalaýdan agroónerkásiptik keshendi jeńildetilgen nesıeleý júıesine kóshý qajettigin atap ótti.
Prezıdenttiń aýyl sharýashylyǵy taýar óndirýshileri úshin qarjylandyrýdyń qoljetimdiligin arttyrý jónindegi tapsyrmasyn oryndaý maqsatynda qarjy ınstıtýttaryn sýbsıdııalaý tetigi ázirlendi. Jańa shemaǵa sáıkes, bankter men ózge de qarjy uıymdary qarajat tartý kezeńinde syıaqy mólsherlemesin tómendetedi. Nátıjesinde, agroónerkásiptik keshen sýbektileri – túpkilikti qaryz alýshylar jyldyq mólsherlemesi 5%-dan aspaıtyn nesıe ala alady.
2025 jyly atalǵan tetik Agrarlyq nesıe korporatsııasy arqyly aprobatsııalanýda. Korporatsııa jyldyq 5% syıaqy mólsherlemesimen jeńildetilgen nesıe berýdi bastady.
Bastamany iske asyrý úshin respýblıkalyq bıýdjetten 7,7 mlrd teńge kóleminde sýbsıdııa kózdelgen. Pılottyq joba aıasynda «Agrarlyq nesıe korporatsııasy» AQ óńdeýshi kásiporyndarǵa aınalym qarajatyn tolyqtyrý úshin 44,3 mlrd teńge somasynda jeńildetilgen nesıe usynyp otyr.
Naryqtyq jáne jeńildetilgen mólsherlemelerdiń aıyrmasyn Aýyl sharýashylyǵy mınıstrligi qarjy ınstıtýttaryna tikeleı óteıdi. Mundaı tásil bıýrokratııany boldyrmaýǵa, sybaılas jemqorlyq táýekelderin azaıtýǵa jáne bıýdjet qarajatyn tıimdi paıdalanýǵa múmkindik beredi. Bul rette myńdaǵan fermerler men ondaǵan oblystyq basqarmalardyń sýbsıdııalaý rásimine qatysý qajettiligi bolmaıdy.
2026 jyldan bastap respýblıkalyq bıýdjetten tıisti qarjylandyrý qamtamasyz etilgen jaǵdaıda jeńildetilgen nesıeleý baǵdarlamasyna ekinshi deńgeıli bankter de qosylady.
Sonymen qatar «Agrarlyq nesıe korporatsııasy» AQ bordaqylaý alańdaryn jeńildetilgen nesıeleý jumysyn bastady. Bul qarajat ta jyldyq mólsherlemesi 5%-dan aspaıtyn deńgeıde usynylady.
Aıta ketelik Qazaqstanda 5,9 mln tonna astyq jınaldy.