Ekinshi deńgeıdegi bankterden alynǵan nesıeler esepten shyǵaryla ma – resmı jaýap

ASTANA. KAZINFORM – Áleýmettik jelide «ekinshi deńgeıdegi bankterdegi kredıtterdiń esepten shyǵarylatyny týraly» tarap jatqan aqparat shyndyqqa sáıkes kelmeıdi. Bul týraly 2026 jyly 10 qańtarda Qarjy naryǵyn retteý jáne damytý agenttigi málimdedi.

Agenttiktiń Telegram arnasynda buǵan qatysty túsinikteme berilgen. 

– Jalǵan aqparatqa senbeýlerińizdi, tek resmı aqparat kózderin paıdalanýlaryńyzdy suraımyz, sondaı-aq ártúrli deldaldardyń kómegine júginbeýge keńes beremiz, - delingen habarlamada.

Sondaı-aq quzyrly mekeme Qazaqstan Respýblıkasynyń zańnamasynda jalǵan aqparat taratqandarǵa jaýapkershilik qarastyrylatynyn eske salady.

Eske sala keteıik, buǵan deıin Qazaqstanda banktik qaryzdar boıynsha shekti mólsherleme belgilengenin jazǵanbyz.