Ekinshi AES-ti Qytaı salatyndyǵyna qatysty túpkilikti sheshim qabyldanǵan joq — agenttik

ASTANA. KAZINFORM — Ekinshi AES-ti Qytaı salatyndyǵyna qatysty túpkilikti sheshim qabyldanǵan joq. Bul týraly Atom energetıkasy jónindegi agenttikten málim etti. 

— «Rosatom» kompanııasy Qazaqstanda birinshi AES qurylysy boıynsha «China National Nuclear Corporation» usynysynan azdaǵan basymdyqpen ozyp ketti. Atap óterligi, ekinshi AES boıynsha sheshim áli qabyldanǵan joq. Biraq, qytaılyq kompanııanyń usynysy atalǵan joba úshin qarastyrylyp jatyr, — dedi agenttikten BAQ ókilderiniń saýalyna oraı.

Agenttik tıimdi halyqaralyq konsortsıým qurý aıasynda short-paraq qatysýshylarynyń bárimen dıalog júrgizilgenin atap ótedi. Bul dıalog aldaǵy ýaqytta jalǵasady.

— Qazaqstan bolashaq energetıkasyn salady jáne bul júıede túrli tehnologııalyq sheshimderge oryn tabylady. Qazirgi ýaqytta short-paraqtaǵy ózge de kompanııalarmen basqa AES jáne servıs pen tehnıkalyq qyzmet kórsetý, oqshaýlaý men ıadrolyq-otyn tsıkli syndy aralas baǵyttar boıynsha yntymaqtastyqtyń túrli nusqalary qarastyrylyp jatyr. Ekinshi AES boıynsha túpkilikti sheshim qabyldaý úshin kommertsııalyq kelissózderdi aıaqtaý qajet, — dedi vedomstvodan.

Buǵan deıin «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtalǵanyn jazǵan edik. 

Sonymen qatar Atom energetıkasy jónindegi agenttik tóraǵasy Almasadam Sátqalıev Qazaqstandaǵy taǵy bir AES-ti qytaılyq vender salatynyn málim etti.

AES-ten óndiriletin elektr energııasynyń quny JEO men JES-ten alynatyn elektr energııasyna qaraǵanda joǵary bolady.