EQQDB Ózbekstanǵa «jasyl» ekonomıkany damytý úshin 200 mıllıon dollar bólýi múmkin
ASTANA. KAZINFORM – Eýropa qaıta qurý jáne damý banki Ózbekstanǵa «jasyl» ekonomıkany damytý úshin 200 mıllıon AQSh dollaryna deıin nesıe berý múmkindigin qarastyryp jatyr. Bul týraly Ózbekstannyń Ekonomıka jáne qarjy mınıstrligi habarlady.
2024 jyldyń 14 qarashasynda mınıstrlik delegatsııasy Bakýde ótken BUU-nyń klımattyń ózgerýi jónindegi konferentsııasy (COP29) aıasynda EQQDB klımattyq baǵdarlamalarynyń top-menedjerlerimen kelissózder júrgizgeni atap ótildi. Onda metan shyǵaryndylaryn azaıtýǵa baǵyttalǵan jobalardy júzege asyrý barysy talqylandy.
Memorandým aıasynda «jasyl» qarjylyq qyzmetterdi engizý boıynsha arnaıy baǵdarlamany qoldaý tetikterin ázirlep, iske qosý josparlanyp otyr. Bul maqsattarǵa 200 mıllıon dollarǵa deıin bólinedi.
Taraptar qaldyq jáne aǵyn sýlardy tazartý ónerkásibi shyǵaratyn shyǵaryndylardy azaıtýǵa ınvestıtsııalaý baǵdarlamasyn qurýǵa nıetti. Yntymaqtastyqtyń taǵy bir salasy sý, azyq-túlik jáne energetıka salalarynda Nexus eldik platformasyn iske asyrý bolmaq.
Eske sala keteıik, buǵan deıin Qazaqstan men Ózbekstan Aqtaý teńiz portynda birlesken jobalardy iske asyrýdy josparlaǵanyn jazǵan edik.
