EQQDB Qazaqstanǵa JI retteý jáne kıberqaýipsizdik salasynda qoldaý kórsetedi
ASTANA. KAZINFORM — Eýropalyq qaıta qurý jáne damý bankiniń (EQQDB) prezıdenti Odıl Reno-Basso jasandy ıntellektini damytýda kıberqaýipsizdik, derekterdi qorǵaý jáne tıimdi memlekettik basqarý basty basymdyqqa aınalǵanyn málimdedi. Bank Qazaqstanǵa JI-di qaýipsiz ári jaýapkershilikpen engizýge qajetti quqyqtyq tetikterdi ázirleý men halyqaralyq standarttardy engizý baǵytynda qoldaý kórsetýge daıyn.
Onyń aıtýynsha, jasandy ıntellektini engizý qarqyny kúsheıgen saıyn, tsıfrlyq transformatsııany jaýapkershilikpen júrgizý men tıimdi memlekettik basqarýdy qamtamasyz etý ulttyq basymdyqqa aınalyp otyr.
— Eýropalyq qaıta qurý jáne damý banki bul úderiske qoldaý kórsetip, memlekettik organdarǵa ınnovatsııalardy damytýǵa, qaýipsizdikti, ashyqtyqty jáne básekege qabiletti qatar qamtamasyz etetin quqyqtyq tetikterdi ázirleýge kómektesedi. Sonymen birge, bank óz jobalaryna, baǵalaý rásimderine jáne konsýltatsııalyq qyzmetine kıberqaýipsizdik pen JI-di basqarýdyń halyqaralyq standarttaryn engizip keledi, — dedi Odıl Reno-Basso QR Prezıdenti janyndaǵy Sheteldik ınvestorlar keńesiniń 38-otyrysynda.
Budan bólek, EQQDB seriktesteriniń tsıfrlandyrý dáýiriniń jańa talaptaryna beıimdelýine kómektesý úshin oqytý baǵdarlamalaryn uıymdastyrýǵa jáne konsýltatsııalyq qoldaý kórsetýge daıyn.
Bul bank qoldaıtyn JI jobalarynyń tıimdi basqarý tetikterimen, senimdi derekterdi qorǵaý júıesimen, kıberqaýipsizdiktiń zamanaýı quraldarymen jáne pármendi baqylaý mehanızmderimen qamtamasyz etilýine múmkindik beredi.
Aıta keteıik, EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin.
Buǵan deıin Odıl Reno-Basso Qazaqstannyń tsıfrlyq damý tájirıbesi EQQDB strategııasymen úndesetinin aıtqan edi.
Sondaı-aq EQQDB Qazaqstandaǵy derekterdi óńdeý ortalyqtaryna ınvestıtsııa salýdy josparlap otyr.
