EQQDB Qazaqstandaǵy derekterdi óńdeý ortalyqtaryna ınvestıtsııa salýdy josparlap otyr
ASTANA. KAZINFORM — Eýropalyq qaıta qurý jáne damý banki (EQQDB) Qazaqstandaǵy derekterdi óńdeý ortalyqtary jelisin damytýǵa ınvestıtsııa salý múmkindigin qarastyryp jatyr. Bul týraly EQQDB prezıdenti Odıl Reno-Basso Astanada Sheteldik ınvestorlar keńesiniń otyrysynda málimdedi.
O. Reno-Bassonyń aıtýynsha, Qazaqstanmen yntymaqtastyqtyń eń perspektıvaly baǵyttarynyń biri — tsıfrlyq ınfraqurylymdy damytý jáne derekterdiń tsıfrlyq egemendigin qamtamasyz etý.
— Qazaqstan bul baǵytty óziniń tsıfrlyq strategııasynyń negizgi basymdyqtarynyń birine aınaldyrdy. EQQDB osy maqsatty qoldaý úshin qarjylandyrýdy, tehnıkalyq kómekti jáne memlekettik saıasat máseleleri boıynsha dıalogty ushtastyryp keledi. Bank zamanaýı derekterdi óńdeý ortalyqtary men transshekaralyq tsıfrlyq ınfraqurylymdy damytýǵa ınvestıtsııa salady. Sonymen qatar jeke kapıtaldy tartýǵa múmkindik beretin quqyqtyq jáne ınvestıtsııalyq tetikterdi ázirleýde úkimetterge qoldaý kórsetedi, — dedi bank basshysy.
Qazirgi ýaqytta EQQDB Qazaqstan men Ortalyq Azııada derekterdi óńdeý ortalyqtaryn damytýǵa kedergi keltiretin faktorlar men jańa múmkindikterdi anyqtaý maqsatynda zertteý júrgizip jatyr.
— Zertteý nátıjeleri banktiń osy saladaǵy aldaǵy ınvestıtsııalyq jáne strategııalyq sheshimderiniń negizine aınalady, — dep túıindedi Odıl Reno-Basso.
Aıta keteıik, EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin.
Buǵan deıin Odıl Reno-Basso Qazaqstannyń tsıfrlyq damý tájirıbesi EQQDB strategııasymen úndesetinin aıtqan edi.
