EQQDB Qazaqstanda energetıka men tsıfrlyq ınfraqurylymǵa ınvestıtsııany arttyrady
ASTANA. KAZINFORM — Eýropalyq qaıta qurý jáne damý bankiniń (EQQDB) prezıdenti Odıl Reno-Basso tsıfrlyq ekonomıkany damytý úshin eń aldymen ornyqty energetıka men zamanaýı ınfraqurylym qajet ekenin aıtty. Onyń sózinshe, bank Qazaqstanda jańartylatyn energetıkany damytýǵa, elektr jelilerin jańǵyrtýǵa jáne kólik ınfraqurylymyn tsıfrlandyrýǵa qoldaý kórsetýdi jalǵastyrady.
Odıl Reno-Basso Qazaqstanmen yntymaqtastyqtyń áleýeti joǵary tórt baǵytty erekshe atap ótti. Birinshi baǵyt — berik irgetas, ornyqty energetıka men zamanaýı ınfraqurylym. Sebebi zamanaýı tsıfrlyq ekonomıkany senimdi fızıkalyq ınfraqurylymsyz elestetý múmkin emes. Ol úshin turaqty ári jetkilikti energııa kózderi de qajet.
— Qazaqstan úshin bul úsh negizgi mindetti bildiredi: jańartylatyn energııa kózderiniń qýatyn arttyrý, elektr jelilerin jańǵyrtý jáne kólik ınfraqurylymyn tsıfrlandyrý. Sońǵy jyldary EQQDB jańartylatyn energetıka salasynda qýaty 2 gıgavatt bolatyn jańa nysandardyń iske qosylýyna qoldaý kórsetti. Sońǵy jobalardyń biri — Jambyl oblysynda energııa jınaqtaý júıesimen jabdyqtalǵan jel elektr stantsııasynyń qurylysy. Bul joba TotalEnergies, «Samuryq-Qazyna» jáne «QazMunaıGaz» kompanııalarynyń qatysýymen júzege asyrylyp jatyr, — dedi bank basshysy QR Prezıdenti janyndaǵy Sheteldik ınvestorlar keńesiniń 38-otyrysynda.
Sonymen qatar, KEGOC kompanııasynyń energetıkalyq ınfraqurylymyn damytýǵa kórsetilip otyrǵan qoldaý da erekshe mańyzdy. Batys Qazaqstan óńirin Biryńǵaı elektr energetıkalyq júıesine qosý derekterdi óńdeý ortalyqtary, jasandy ıntellektiniń esepteý keshenderi jáne energııany kóp qajet etetin ózge de jobalar úshin qajetti senimdi energetıkalyq ınfraqurylymdy qalyptastyrýda sheshýshi ról atqarady.
Buǵan qosa, elektr taratý jelilerin tsıfrlandyrý jáne aqyldy elektr jelilerin engizý elektrmen jabdyqtaýdyń senimdiligin arttyrýǵa, energııa júıesiniń teńgerimin tıimdi basqarýǵa ári jańartylatyn energııa kózderin júıege tıimdi ıntegratsııalaýǵa múmkindik beredi.
— EQQDB kólik ınfraqurylymyn tsıfrlyq jańǵyrtýǵa da qoldaý kórsetip keledi. Atap aıtqanda, «E-Joldar» jol aktıvterin basqarýdyń tsıfrlyq platformasy jáne aqy alý júıeleri joldardy paıdalaný tıimdiligin arttyrýǵa, jol qozǵalysynyń qaýipsizdigin jaqsartýǵa, keptelisti azaıtýǵa jáne qorshaǵan ortaǵa túsetin júktemeni tómendetýge baǵyttalǵan. Mundaı ınvestıtsııalar ınfraqurylymdy jańǵyrtyp qana qoımaı, Qazaqstan ekonomıkasyn tehnologııaǵa jáne derekterge negizdelgen jańa damý kezeńine beıimdeıdi, — dedi Odıl Reno-Basso.
Aıta keteıik, EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin.
Buǵan deıin Odıl Reno-Basso Qazaqstannyń tsıfrlyq damý tájirıbesi EQQDB strategııasymen úndesetinin aıtqan edi.
