EQYU ókilderimen kezdesýde saılaý úderisterin jetildirý máselesi kóterildi
ASTANA. KAZINFORM — Májilistegi Zańnama jáne sot-quqyqtyq reforma komıtetiniń tóraǵasy Snejanna Imasheva men depýtat Magerram Magerramov Eýropadaǵy Qaýipsizdik jáne Yntymaqtastyq Uıymy Demokratııalyq ınstıtýttar jáne adam quqyqtary jónindegi bıýrosynyń Saılaý departamenti dırektorynyń orynbasary Ýlvı Ahýndlýmen kezdesti. Bul týraly Májilistiń baspasóz qyzmeti málim etti.
Taraptar Qazaqstan men Eýropadaǵy Qaýipsizdik jáne Yntymaqtastyq Uıymy Demokratııalyq ınstıtýttar jáne adam quqyqtary jónindegi bıýro arasyndaǵy qazirgi ózara is-áreketti, saılaý zańnamasyn jetildirý máselelerin, sondaı-aq aldaǵy birlesken jumys perspektıvalaryn talqylady.
Sheteldik qonaqty qarsy alǵan Snejanna Imasheva Qazaqstan 1992 jyly Uıymǵa múshe bolǵan kúnnen bastap Eýropadaǵy Qaýipsizdik jáne Yntymaqtastyq Uıymymen yntymaqtastyqty dáıekti túrde damytyp kele jatqanyn atap ótti.
— Sizdiń bıylǵy kezekti saparyńyzdy Qazaqstan men Eýropadaǵy Qaýipsizdik jáne Yntymaqtastyq Uıymy Demokratııalyq ınstıtýttar jáne adam quqyqtary jónindegi bıýro arasyndaǵy belsendi ári syndarly ózara is-árekettiń kórinisi retinde qarastyramyz, — dedi komıtet tóraǵasy.
Kezdesý barysynda uıym mıssııalarynyń Qazaqstandaǵy elektoraldyq protsesterdi, sonyń ishinde Parlament jáne Prezıdent saılaýlaryn, sondaı-aq 2022 jylǵy jáne 2026 jylǵy referendýmdardy baıqaý jumystary atap ótildi. Adam quqyqtary, zań ústemdigi, sot júıesiniń táýelsizdigi, genderlik teńdikti damytý jáne adam saýdasyna qarsy is-áreket máselelerine erekshe nazar aýdaryldy.
Meımanǵa naýryz aıyndaǵy referendým qorytyndysy boıynsha qabyldanǵan jańa Konstıtýtsııanyń negizgi erejeleri, sondaı-aq ony iske asyrý úshin ázirlengen zańnamalyq ózgerister týraly aqparat berildi.
Kezdesý qorytyndysy boıynsha taraptar elektoraldyq protsester boıynsha syndarly dıalogty qoldaýǵa ózara múddeli ekenderin aıtty.
Aıta keteıik, buǵan deıin Májiliske Chernogorııa Prezıdenti kelgenin jazdyq.
