EQYU-nyń Shyǵys pen Batystyń arasyn baılanystyrýshy kópir bolyp qala bergeni mańyzdy – Áshimbaev
ASTANA. KAZINFORM - Senat cpıkeri Máýlen Áshimbaev Eýropadaǵy qaýipsizdik jáne yntymaqtastyq uıymynyń qazirgi tóraǵasy, Maltanyń Syrtqy, eýropalyq ister jáne saýda mınıstri Ian Borchpen kezdesti, dep habarlaıdy Senattyń baspasóz qyzmeti.
Máýlen Áshimbaev meımanǵa iltıpat bildirip, halyqaralyq qaýipsizdiktiń zamanaýı kelbetin qalyptastyrý isinde EQYU aıryqsha ról atqaratynyn aıtty. Sondyqtan, Senat tóraǵasy atap ótkendeı, Uıymnyń Shyǵys pen Batystyń arasyn baılanystyrýshy kópir bolyp qala bergeni asa mańyzdy.
Kezdesý barysynda Qazaqstan áskerı-saıası, ekonomıkalyq-ekologııalyq, gýmanıtarlyq jáne basqa da barlyq negizgi baǵyt boıynsha Uıymmen nátıjeli ózara is-qımyl ornatqany aıtyldy. Óńirdegi yntymaqtastyqty damytýǵa baǵyttalǵan arnaıy Jol kartasyn iske asyrý aıasynda Qazaqstannyń Ortalyq Azııa elderimen qarym-qatynasynyń perspektıvalary da sóz boldy. Taraptar aımaqtaǵy geosaıası jaǵdaıdy turaqtandyrý, ornyqty damý maqsattaryn iske asyrý, sondaı-aq, ekologııalyq jáne sý qaýipsizdigi máseleleri boıynsha birlesken sharalarǵa da erekshe nazar aýdardy.
«Byltyr qyrkúıekte Dýshanbede ótken Ortalyq Azııa memleketteri basshylarynyń Sammıtinde Qazaqstan Prezıdenti Qasym-Jomart Kemeluly Toqaev Ortalyq Azııada sý jáne energetıka resýrstaryn tıimdi paıdalanýdy qamtamasyz etý úshin uzaq merzimdi, ornyqty óńirlik tetik qurýdy qoldady. Qazaqstan sý máseleleri boıynsha EQYU-nyń Astanadaǵy Baǵdarlamalyq keńsesimen belsendi yntymaqtastyq ornatty. Byltyr Ornyqty damý salasyndaǵy ulttyq maqsat-mindetterdiń iske asyrylýyna monıtorıng júrgizý jónindegi Parlamenttik komıssııa quryldy. Ortalyq Azııa memleketteri Halyqaralyq Araldy qutqarý qory arqyly Aral teńizi basseınindegi ekologııalyq jáne áleýmettik-ekonomıkalyq máselelerdi sheshý úshin halyqaralyq uıymdarmen yntymaqtasa jumys istep keledi. Osy rette EQYU-ǵa sý únemdeý tehnologııalary salasyndaǵy ozyq tájirıbeni zerdeleýge jáne Ortalyq Azııada, búkil óńirde sý máseleleri boıynsha belsendi dıalogqa járdem berýge arnalǵan almasý baǵdarlamalaryn keńeıtýge turaqty qoldaý kórsetkeni úshin rızashylyǵymyzdy bildiremiz», – dedi Máýlen Áshimbaev.
Sonymen qatar Senat tóraǵasy Memleket basshysynyń bastamasymen qolǵa alynǵan reformalardyń iske asyrylý barysyna jáne Qazaqstannyń qarqyndy damýyn qamtamasyz etýge arnalǵan zańnamalyq jumysqa toqtaldy. Sondaı-aq ol 2022 jyly ótkizilgen respýblıkalyq referendým nátıjesinde Konstıtýtsııaǵa bılikti ortalyqsyzdandyrýǵa, saıası júıeniń tejemeligi men tepe-teńdigin kúsheıtýge jáne eldegi saıası básekelestikke qatysty mańyzdy túzetýler engizilgenin atap ótti.
Óz kezeginde Ian Borch Qasym-Jomart Toqaevtyń basshylyǵymen Qazaqstanda júzege asyrylyp jatqan aýqymdy saıası jáne ekonomıkalyq ózgeristerdi joǵary baǵalady. Sondaı-aq yntymaqtastyqty odan ári nyǵaıtýǵa jáne baılanys aıasyn keńeıtýge múddeli ekenin bildirdi.
Odan bólek, kezdesýde Qazaqstannyń Eýropalyq Odaqpen yntymaqtastyq máseleleri, onyń ishinde jasyl ekonomıkaǵa kóshý, saýda jáne ınvestıtsııalar, energetıka, aýyl sharýashylyǵy, kólik jáne logıstıka, bilim jáne ǵylym, týrızm jáne basqa da salalar boıynsha qarym-qatynasty arttyrý barysy talqylandy.
