EQYU mıssııasy Qazaqstandaǵy Quryltaı saılaýyn baqylaýǵa kiristi
ASTANA. KAZINFORM – Qazaqstan Respýblıkasy Mádenıet jáne aqparat mınıstrliginde vıtse-mınıstr Evgenıı Kochetov Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýrosynyń (EQYU/DIAQB) mıssııa basshysy Vınsent Pıketpen kezdesti.
QR Mádenıet jáne aqparat mınıstrligi baspasóz qyzmetiniń habarlaýynsha, kezdesý barysynda taraptar 23 tamyzda ótetin bir palataly parlament – Quryltaı saılaýyna daıyndyq, saılaýaldy naýqanyn baqylaý jáne ony uıymdastyrý barysyn talqylady. Bul – jańa Konstıtýtsııa qabyldanǵannan keıin ótetin alǵashqy saılaý. Jıynda saılaý úderisiniń ashyq ári ádil ótýine jaǵdaı jasaý jáne ony aqparattyq turǵydan qamtamasyz etý máseleleri sóz boldy.
Vıtse-mınıstr jańa Konstıtýtsııa Qazaqstannyń demokratııalyq damý baǵytyn, azamattyq qoǵam ınstıtýttaryn nyǵaıtýǵa, azamattardyń quqyqtary, bostandyqtary men zańdy múddelerin qorǵaýǵa negizdelgen saıasatyn odan ári jalǵastyryp otyrǵanyn atap ótti. Sonymen qatar halyqaralyq baıqaýshylar mıssııalarymen, onyń ishinde EQYU/DIAQB-men yqpaldastyqtyń mańyzyn jetkizdi.
Óz kezeginde Vınsent Pıket saılaý barysyn qadaǵalaý úshin Qazaqstanǵa 22 uzaq merzimdi baıqaýshy kelgenin aıtty. Mıssııanyń málimetinshe, saılaýaldy naýqanyn baqylaý qorytyndysyna arnalǵan alǵashqy aralyq esep 7 tamyzda jarııalanady. Al qorytyndy esep saılaý aıaqtalǵannan keıin ázirlenedi.
Kezdesý sońynda taraptar Quryltaı saılaýyna daıyndyq pen ony ótkizý kezeńinde yntymaqtastyqty jalǵastyrýǵa nıetti ekenin jetkizdi.
Osyǵan deıin habarlaǵanymyzdaı, QR Syrtqy ister mınıstrligi 23 tamyzǵa belgilengen Qazaqstan Respýblıkasy Quryltaıy depýtattarynyń saılaýyn jarııalaýǵa nıetti sheteldik buqaralyq aqparat quraldar ókilderi úshin akkredıtteýdi bastady.
