EQYU DIAQB Quryltaı saılaýyn uıymdastyrýǵa baǵa berdi

— Bizdiń shaqyrýymyzdy qabyl alyp, qysqa merzimdi, sondaı-aq uzaq merzimdi baıqaýshylardy jibergenderińiz úshin alǵysymyzdy bildiremiz. Saılaý naýqany barysynda meniń jáne Ortalyq saılaý komıssııasy músheleriniń olarmen pikir almasýǵa múmkindigimiz boldy. QR OSK negizgi mindeti — daýys berý kúnin uıymdastyrýdyń joǵary deńgeıin qamtamasyz etý. Saılaý komıssııalaryna qoıylǵan basty talap daýys berý rásimderiniń barynsha ashyqtyǵy men obektıvtiligin qamtamasyz etý boldy. Sizderdiń Mıssııalaryńyzdyń, sondaı-aq barlyq basqa halyqaralyq mıssııalardyń jáne basqa elderdiń ortalyq saılaý organdaryndaǵy áriptesterimizdiń saılaý protsesin uıymdastyrýǵa bergen oń baǵasyna qanaǵattanamyz, — dep atap ótti Nurlan Ábdirov.

Mıssııanyń Aralyq esebi jáne Saılaýdyń aldyn ala nátıjeleri men qorytyndylary týraly málimdemesin talqylaý barysynda Ortalyq saılaý komıssııasynyń tóraǵasy birqatar máselelerge nazar aýdardy. Atap aıtqanda, OSK basshysy Quryltaıdyń jańa saıası ınstıtýt ekenin atap ótip, osyǵan baılanysty ótken saılaý Mıssııanyń qujattarynda kórsetilgendeı, «merziminen buryn ótkizilgen parlamenttik saılaý» bolyp tabylmaıtyndyǵyn jáne ony belgilengen merzimnen buryn ótkizildi dep esepteýge bolmaıtynyn aıtty. Sonymen qatar, Qazaqstan Prezıdentiniń saılaýdy ótkizý týraly Jarlyqqa qol qoıǵan kúni daýys berý kúnine bir jylǵa jýyq ýaqyt qalǵanda bastalǵan ashyq konstıtýtsııalyq protsestiń sońǵy quqyqtyq kezeńi bolǵany atap ótildi. Ol Memleket basshysy alǵash ret bir palataly Parlamentke kóshý týraly bastamany 2025 jylǵy 8 qyrkúıekte Qazaqstan halqyna Joldaýynda usynǵanyn eske saldy. Osy sátten bastap atalǵan bastamany iske asyrý boıynsha júıeli jumys júrgizildi.

OSK tóraǵasy saılaý protsesine qatysýshylardy oqytý boıynsha júrgizilgen aýqymdy jumystar týraly da aıtyp berdi. Atap aıtqanda, 71 270 saılaý komıssııasynyń múshesin qamtyǵan 7 567 semınar ótkizildi. Sondaı-aq saıası partııalardyń, buqaralyq aqparat quraldarynyń jáne qoǵamdyq uıymdardyń ókilderine arnalǵan arnaıy oqytý semınarlary uıymdastyryldy. Barlyǵy 23 323 adam qatysqan 1 131 is-shara ótkizildi.

Kezdesý barysynda dástúrli jáne zamanaýı kommýnıkatsııa arnalaryn biriktirgen aqparattyq-túsindirý naýqanyna da nazar aýdaryldy. Nurlan Ábdirov derbes derekterdi qorǵaýdy qamtamasyz etý, múgedektigi bar adamdar úshin ýchaskelerdiń qoljetimdiligi jáne baıqaýshylardyń jumysyna qajetti jaǵdaı jasaý máselelerine de toqtaldy.

— Ortalyq saılaý komıssııasy úshin baıqaý ınstıtýty — jaı ǵana formaldylyq emes, ashyq ári transparentti saılaý protsesiniń asa mańyzdy elementi. Akkredıtteýge berilgen barlyq ótinish qanaǵattandyryldy. Saılaý naýqanynyń búkil kezeńinde qoǵamdyq birlestikti nemese kommertsııalyq emes uıymdy akkredıtteýden bas tartý, sondaı-aq buryn berilgen akkredıtteý týraly kýálikterdi qaıtaryp alý jaǵdaılary bolǵan joq. Daýys berý kúni saılaý ýchaskelerinde zańnamada belgilengen barlyq saılaý rásimderi saqtaldy. Baıqaýshylar tarapynan ýchaskelik saılaý komıssııalarynyń rásimdik buzýshylyqtary týraly birde-bir akt jasalmaǵan. Baıqaýshylar men jýrnalısterden de resmı shaǵymdar men ótinishter kelip túspedi. Daýys berý kúni saılaý rásimderiniń saqtalýyna 51 myńnan astam ulttyq baıqaýshy, partııalyq tizimderin usynǵan saıası partııalardyń 7 003 senim bildirgen ókili baıqaý júrgizdi. Sondaı-aq baıqaýǵa 42 shet memleketten jáne 13 halyqaralyq uıymnan 777 halyqaralyq baıqaýshy qatysty, — dep atap ótti Nurlan Ábdirov.

Óz kezeginde Vınsent Pıket baıqaýshylardyń jumysyna jaǵdaı jasaǵany, sondaı-aq ashyqtyq pen ortalyq jáne óńirlik deńgeıde baıqaýshylarǵa tıisti aqparatty usynýǵa únemi daıyn bolǵany úshin Qazaqstan tarapyna rızashylyǵyn bildirdi.

— EQYU DIAQB Mıssııasynyń aldyn ala málimdemesinde biz Ortalyq saılaý komıssııasy atqarǵan jumystyń tıimdi bolǵanyn jáne joǵary tehnıkalyq deńgeıde oryndalǵanyn moıyndaımyz. Sizderdiń óńirlik jáne jergilikti saılaý ýchaskelerin, sondaı-aq ýchaskelik jáne aýmaqtyq saılaý komıssııalaryn daıyndaý barysynda qoldanǵan dáıekti tásilderińizdi atap ótemiz. Biz búkil el boıynsha saılaý komıssııalarynyń 70 myń qyzmetkerin kaskadty oqytýǵa, sondaı-aq saılaýshylardy aqparattandyrýǵa qanshalyqty kúsh jumsalǵanyn túsinemiz. Mıssııanyń Qorytyndy esebi jarııalanǵannan keıin, onda qamtylǵan usynymdar men qorytyndylardy zerdeleýge múmkindikterińiz bolady dep úmittenemin, — dep atap ótti Vınsent Pıket.

Sondaı-aq EQYU DIAQB-nyń aldyn ala esebinde saılaý naýqany jalpy alǵanda qalypty, ári uıymdasqan túrde ótip, saılaý kúni jaqyndaǵan saıyn qarqyn alǵany atap ótiledi. Barlyq deńgeıdegi saılaý komıssııalary saılaýǵa tehnıkalyq daıyndyqty kásibı túrde júzege asyryp, zańda belgilengen merzimderdi saqtady jáne saılaýǵa qatysýshy partııalardyń senimine ıe boldy. Ortalyq saılaý komıssııasy múddeli taraptar men BAQ ókilderi qatysqan ashyq otyrystardy turaqty túrde ótkizdi.

Kezdesý sońynda Nurlan Ábdirov Baıqaýshylar mıssııasynyń Qorytyndy esebi mańyzdy qujat bolyp tabylatynyn atap ótti. Onda kórsetilgen barlyq usynymdar men qorytyndylar muqııat zerdelenip, onyń ishinde QR Ortalyq saılaý komıssııasy janyndaǵy Sarapshylyq keńestiń otyrysynda talqylanatyn bolady.

Aıta keteıik, saılaý naýqany barysynda OSK tóraǵasy men músheleri EQYU DIAQB Saılaýdy baıqaý mıssııasynyń baıqaýshylarymen birqatar mazmundy ári jan-jaqty kezdesýler ótkizip, olar kótergen suraqtarǵa tolyqqandy jaýap berdi. Sondaı-aq EQYU DIAQB baıqaýshylary Ortalyq saılaý komıssııasy músheleriniń aımaqtarǵa ınspektsııalyq saparlary aıasynda uıymdastyrylǵan is-sharalarǵa qatysty. Olar ózderin qyzyqtyrǵan máseleler boıynsha suraqtar qoıyp, ýchaskelik saılaý komıssııalarynyń múshelerimen suhbattasty, jergilikti jerlerde saılaýdy uıymdastyrý barysymen tanysty.

Eske salaıyq, 23 tamyzda Qazaqstanda jańa bir palataly parlament — Quryltaı depýtattarynyń saılaýy ótti. Saılaý qorytyndysy boıynsha Quryltaıǵa bes saıası partııa ótti.