EQYU DIAQB baqylaýshylary búkil el boıynsha jumys istep jatyr
ASTANA. KAZINFORM — EQYU-nyń demokratııalyq ınstıtýttar jáne adam quqyqtary jónindegi bıýrosynyń saılaýdy baqylaý mıssııasynyń basshysy, elshi Vınsent Pıket Quryltaıdaǵy saılaýdyń barysyna qatysty pikir bildirdi.
Spıker saılaý naýqanynyń aýqymdylyǵyn jáne Ortalyq saılaý komıssııasynyń jumysyn atap ótip, EQYU DIAQB baıqaýshylary búkil el boıynsha jumys istep jatqanyna toqtaldy.
— Bul Kazahstan úshin mańyzdy saılaý ekeni anyq. Astanada úlken belsendilikti baıqadyq, al bul Ortalyq saılaý komıssııasy úshin aýqymdy jumys. El boıynsha basqarylýy tıis 10 000-nan astam saılaý ýchaskesi bar jáne biz osy protsesti baqylaýǵa tyrysyp jatyrmyz. Bizdiń baqylaý mıssııamyzda barlyq oblys pen respýblıkalyq mańyzy bar qalalarda ornalasqan 200 sarapshy bar. Sonymen qatar, bizge qosymsha 100-ge jýyq parlamentshi qatysyp jatyr. Osylaısha, saılaýdyń qalaı ótip jatqanyn kórý úshin búkil el boıynsha barlyǵy 300 sarapshy jumys istep jatyr, — dedi Vınsent Pıket.
Mıssııa basshysy óz sózinde baıqaýshylardyń basty mindeti saılaý protsesin jáne onyń Qazaqstan qabyldaǵan halyqaralyq mindettemelerge sáıkestigin baǵalaý ekenin basa aıtty.
— Biz bul jerde saılaýdy baqylaý úshin júrmiz. Mindetimiz saılaýdyń Qazaqstan 1992 jyly EQYU-ǵa múshe bolǵan kezde ózine alǵan mindettemelerine qanshalyqty saı keletinin baqylaý. Bul bizdiń osy maqsatpen Qazaqstanǵa 16-shy ret kelip jatyrmyz. Biz jalpy protseske tolyqtaı nazar aýdaramyz, — dep tolyqtyrdy ol.
Onyń aıtýynsha, baıqaýshylar saılaý protsesiniń barlyq kezeńin zańnama men ınstıtýttardyń jumysynan bastap, partııalar men saılaýshylardy tirkeýge, sondaı-aq saılaýaldy naýqandy qarjylandyrý men ony ótkizý jaǵdaılaryna deıin baǵalaıdy.
— Daýys berý kúni baıqaýshylar Astanadaǵy jáne elimizdiń ózge óńirlerindegi saılaý ýchaskelerinde protsesti tikeleı baqylaıdy. Árıne, búgin biz daýys berý barysyn Astanada da, eldiń basqa bólikterinde de baqylap otyrmyz. Bul protsestiń qalaı ótetini biz úshin óte qyzyqty, — dep túıindedi ol.
Aıta keteıik, UQShU baıqaýshylary saılaýdy uıymdastyrý deńgeıin joǵary baǵalady.
