EQYU delegatsııasy Astanada ózara áriptestik máselesin kóterdi
ASTANA. KAZINFORM — Eýropadaǵy qaýipsizdik jáne yntymaqtastyq uıymy (EQYU) janyndaǵy AQSh, Germanııa, Italııa, Kanada, Ulybrıtanııa, jáne Frantsııanyń Turaqty ókilderinen quralǵan delegatsııa Astanaǵa issaparmen keldi.Qazaqstan Respýblıkasy Syrtqy ister mınıstrliginde ótken kezdesýde EQYU alańyndaǵy ózara is-qımyl men aldaǵy yntymaqtastyq perspektıvalary qarastyryldy. Bul týraly SІM málim etti.
— Qazaqstannyń EQYU-men yntymaqtastyǵy ózara qurmet, senim jáne qaýipsizdik, ornyqty damý men adam quqyqtary qundylyqtaryna ortaq beıildilikke negizdelgen berik irgetasqa súıenedi, — dep atap ótti QR Syrtqy ister mınıstrdiń orynbasary Arman Isetov.
Sondaı-aq ol Qazaqstan Uıymǵa múshe memlekettermen EQYU-nyń barlyq úsh ólshemi sheńberinde ózara tıimdi yntymaqtastyqty jalǵastyrýǵa daıyn ekenin basa aıtty.
Óz kezeginde, shet memleketterdiń elshileri Qazaqstan Uıymnyń mańyzdy múshesi ekenin atap ótip, EQYU aıasyndaǵy elder arasyndaǵy ózara is-qımyldyń joǵary deńgeıin erekshe atap ótti.
Kezdesý qorytyndysy boıynsha taraptar pragmatıkalyq jáne ózara qolaıly yntymaqtastyqty damytýǵa beıildiligin rastady.
Buǵan deıin Venada ótken EQYU konferentsııasynda Qazaqstannyń tájirıbesi usynyldy.
