EQYU 2025 jyldyń sońyna deıin Mınsk tobyn jabady

ASTANA. KAZINFORM — Taýly Qarabah máselesin retteýge arnalǵan Mınsk toby 2025 jyldyń jeltoqsan aıynan keshiktirilmeı tolyq jabylady. Bul týraly EQYU-nyń qazirgi tóraǵasy, Fınlıandııanyń syrtqy ister mınıstri Elına Valtonen Armenııa Syrtqy ister mınıstri Ararat Mırzoıanmen Erevanda ótkizgen birlesken baspasóz máslıhatynda málimdedi, dep jazdy Kazinform agenttiginiń menshikti tilshisi.

— Biz EQYU Mınsk tobyn jabý týraly birlesken úndeýdi quptaımyz jáne bul úderis 2025 jyldyń jeltoqsanynan keshiktirilmeı aıaqtalady dep úmittenemiz, — dedi Valtonen.

Ol Armenııa men Ázerbaıjan arasyndaǵy beıbitshilik ornatý úderisin oń baǵalap, 2025 jylǵy 8 tamyzda Vashıngtonda qabyldanǵan qadamdardyń mańyzdylyǵyn atap ótti.

— Biz sizderdiń kúsh-jigerińizdi jan-jaqty qoldaýǵa daıynbyz. Meniń bul saparym Armenııa úkimetiniń eldegi azamattyq qoǵamdy nyǵaıtýǵa degen ustanymyn kórýge múmkindik berip otyr. Biz Armenııamen ekijaqty qarym-qatynasty joǵary baǵalaımyz, — dedi EQYU tóraǵasy.

Eske sala keteıik, EQYU Armenııa men Ázerbaıjannyń birlesken ótinishinen keıin Mınsk tobyn (onyń teń tóraǵalary — Reseı, AQSh jáne Frantsııa) jáne oǵan qatysty qurylymdardy resmı túrde jabady. Budan keıin tek ákimshilik qyzmetter atqarylady, atap aıtqanda — múlik pen jabdyqtardy tapsyrý.

Buǵan deıin Armenııa premer-mınıstri Nıkol Pashınıan Ázerbaıjanmen beıbit kelisim men EQYU Mınsk tobyn taratý týraly birlesken málimdemeni qatar qol qoıýdy usynǵan bolatyn.