Ekisbastuzdaǵy apat: Áli 30 úıge jylý berilgen joq

EKІBASTUZ. QazAqparat – Qazirgi tańda jalpy sany 30 turǵyn úıde jylý joq. Bul týraly Pavlodar oblysy ákiminiń mindetin ýaqytsha atqarýshy Oleg Krýk aıtty, dep habarlaıdy QazAqparat tilshisi.

«Bizde 49 úı jylýdan ajyratylǵan edi. Búgin tańerten 52-shi ortalyq jylý pýnktin qosyp, qubyrlarda qatqan muzdary erite bastadyq. Nátıjesinde ortalyqtandyrylǵan jylý júıesinen ajyratylǵan 17 úıdiń altaýyna jylý berildi. Saǵat 18:00-degi jaǵdaı boıynsha OJJ-nen 11 úı, 5a jáne 6 shaǵyn aýdandarda 19 baspana jylýsyz otyr. Qazirgi tańda jalpy sany 30 turǵyn úıde jylý joq», - dedi Oleg Krýk.

Ekibastuz qalasynyń ákimi Aıan Beısekınniń málimetine sáıkes, shaharda áli 40-tan astam úı sýsyz, 11 úı jaryqsyz otyr.

Eske sala keteıik, búgin Tótenshe jaǵdaılar mınıstrligi Ekibastuz qalasyna qosymsha kúshter men quraldar jibergen bolatyn.

Ekibastuz jylý elektr ortalyǵynda apat 27 qarashada bolǵan edi. Saldarynan qala turǵyndary jylýsyz qaldy.

Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Ekibastuz qalasynyń oqýshylary onlaın oqýǵa kóshirildi.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.

30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Keshe, 1 jeltoqsanda QR Prezıdenti Qasym-Jomart Toqaev Ábilqaıyr Sqaqovty Pavlodar oblysynyń ákimi qyzmetinen bosatty. Onyń ornyna ýaqytsha Oleg Krýk taǵaıyndaldy.