Ekinshi jarty jyldyqqa belgilengen ındýstrııalyq jobalar Elbasyna jeltoqsannyń 20-synda tanystyrylady

/em>Qazannyń 18-i. QazAqparat /Rýslan Ǵabbasov/ - Údemeli ındýstrııalyq-ınnovatsııalyq damý memlekettik baǵdarlamasynyń jobalaryn Elbasyna tanystyrý jeltoqsannyń 20-syna belgilenip otyr. Bul týraly búgin selektorlyq rejımdegi Úkimet otyrysynda Premer-Mınıstr Kárim Másimov aıtty.

Úkimet basshysynyń sózine qaraǵanda, qarashanyń úshinshi onkúndiginde ındýstrııalandyrý boıynsha jobalardy iske asyrý barysyna arnalǵan selektorlyq keńes ótedi. «Al, jeltoqsannyń 20-syna qaraı biz bul jobalardy Elbasyna tanystyratyn bolamyz»,-dep atap ótti Premer-Mınıstr.

Osyǵan baılanysty K. Másimov vıtse-premer Áset Isekeshevke tanystyrylatyn jobalar turǵysynda úılestirý jumystaryn júrgizýdi tapsyrdy. «Sondyqtan da, bul jobalarǵa jaýapty adamdar osy máseleni udaıy baqylaýda ustaýy qajet»,-dedi Úkimet basshysy.