Ekinshi toqsanda óńdeýshi ónerkásip pen saýdada suranys tómendeýi múmkin – Ulttyq bank
Ulttyq banktiń aqsha-kredıt saıasaty departamenti dırektorynyń orynbasary Denıs Chernıavskııdiń aıtýynsha, qurylystaǵy suranys kórsetkishi teris aımaqta qalyp keledi. Bıylǵy ekinshi toqsanda qurylys, aýyl sharýashylyǵy men taý-ken ónerkásibi salalarynda suranysqa baılanysty jaǵdaı jaqsarady dep kútilýde. Alaıda, óńdeýshi ónerkásip pen saýdada suranys tómendeýi múmkin. Dese de bul salalardaǵy ındıkator oń aımaqta qalady.
«Shıkizat pen materıaldardyń jáne daıyn ónim baǵasynyń ósý qarqyny jedeldegeni barlyq salada baıqaldy. Ekinshi toqsanda shıkizat pen materıaldardyń jáne daıyn ónim baǵasynyń ósý qarqyny tómendeıdi. Óndiristik qýattardy júkteý deńgeıi taý-ken óndirýden basqa salalardyń barlyǵynda derlik kemidi. Anaǵurlym kemý kórsetkishi qurylysta baıqaldy», - dep túsindirdi spıker.
Onyń sózinshe, básekelestik mańyzdylyǵynyń joǵary deńgeıi burynǵysha saqtalyp otyr. Naryqtyq básekelestik saýda kásiporyndaryna barynsha yqpal etken. Saýda kásiporyndarynyń 41%-y bızneske áserin sezindi. Eń az úles taý-ken ónerkásibinde baıqaldy.
«Sheteldik áriptestermen esep aıyrysýda paıdalanylatyn negizgi valıýta Reseı rýbli bolyp qala beredi. Óńdeý ónerkásibinde rýbldi kásiporyndardyń 68,1%-y, saýdada 58,6%-y paıdalanady. Birinshi toqsanda teńge baǵamynyń AQSh dollaryna qatysty ózgerisiniń sharýashylyq qyzmetke teris áseri artqanyn barlyq sala atap ótti, bul rette AQSh dollary tek taý-ken ónerkásibinde basym boldy», - dedi Denıs Chernıavskıı.
Saýalnamaǵa barlyǵy 2,6 myńnan astam óndirýshi, óńdeý ónerkásibi, qurylys, saýda, aýyl sharýashylyǵy, kólik jáne qoımaǵa jınaýshy kásiporyndar qatysty.
