Ekinshi dúnıejúzilik soǵystyń shyǵyny - 4 trln. dollar
ASTANA. 4 jeltoqsan. QazAqparat - Ekinshi dúnıejúzilik soǵys 1939 jyldyń 1 qyrkúıeginde Germanııa KSRO-men kelisimge kelip, Polshaǵa shabýyl jasaýynan bastaldy.
3 qyrkúıek kúni Ulybrıtanııa men Frantsııa Germanııaǵa soǵys jarııalady. Maıdan osylaı bastalyp, 1941 jyldyń 22 maýsym kúni Germanııa KSRO-ǵa basyp kirdi. Bul kezde Germanııaǵa Vengrııa, Rýmynııa, Fınlıandııa, Italııa memleketteri qosylǵan bolatyn. Gıtler óziniń Qarýly Kúshteriniń 77 paıyzyn KSRO-ǵa qarsy maıdanǵa jumyldyrdy. Qazir ǵalymdar bul soǵysqa 61 memleket, dúnıe júzi halqynyń 80 paıyzy qatynasqanyn jazyp júr. Máselen, soǵys qımyldary 40 memleket jerinde júrip, 110 mln adam áskerge alynypty. Onyń 50-55 mıllıony qaza bolyp, jalpy maıdan úshin 4 trıllıon dollar kóleminde shyǵyn shyqqan. Soǵystyń aıaǵynda fashızm tolyq kúırep, Batys Eýropa elderinde demokratııanyń ornaýyna jol ashyldy. Bul oraıda fashızmniń tolyq talqandalýyna sheshýshi róldi KSRO quramyndaǵy halyqtar atqarǵanyn aıta ketý kerek, dep jazady «Alash aınasy» gazeti.
