«Ekinshi dúnıejúzilik soǵystaǵy qazaq ofıtserleri» atty 10 tomdyq oqyrmanǵa jol tartty
«10 tomdyqtyń týyndyny jazyp, basyp shyǵarýǵa 4 jyl ýaqyt ketti. Ekinshi dúnıejúzilik soǵysqa tikeleı qatysqan 8400-den astam qazaq ofıtserleriniń ómirderekterin jınaý ońaı bolǵan joq. Meniń jumysymnyń 90 paıyzy Máskeýdegi muraǵattarda boldy. Olar maǵan jibergen derekterde suryptaýǵa kóp ýaqyt ketti», - dedi tarıhshy.
Onyń sózine qaraǵanda, ókinishke qaraı, elimizdegi jergilikti áskerı kommısarıattarmen jumys isteý qıynǵa tústi.
«Qazirgi kezde 11-shi tomdy aıaqtaýǵa jaqyndadym. Onyń aıasynda qazaq ofıtserleriniń sany 9 170-ke jetip qaldy. Eń bastysy, Ekinshi dúnıejúzilik soǵysqa qatysqan qazaq ofıtserleriniń úlesi eleýli. Osynyń ózi qazaq halqy úshin úlken abyroı», - deıdi avtor.
J.Dospanov atalǵan 10 tomdyqtyń ishindegi tyń derekterge toqtalyp ótti. Máselen, buryndary 5-6 qazaq áskerı ushqyshy boldy degen maǵlumat bolǵan edi. Endi búginde olardyń sany 64 bolǵany anyqtalyp otyr. Osylardyń arasynda úsheýi eki jyl boıy Máskeýdi áýede qorǵap júrdi.
«Sonymen qatar batalon komandırleri 20-ǵa jýyq dep aıtqan bolatyn. Meniń derekterimde qazaqtan shyqqan 134 batalon komandırleri týraly málimet bar. Endi kitapty oqyǵan adam taǵy da tyń derekterdi kóretin bolady», - dep atap ótti tarıhshy.
Aıta keteıik, bul 10 tomdyqtyq jaryqqa shyǵýyna bınesmender qarjylaı kómektesken eken.
Sonymen qatar tarıhı týyndynyń avtory ne sebepti osy taqyrypty tańdaǵanyna toqtaldy.
«Birneshe jyl buryn Qazaqstannyń qorǵanys salasyndaǵy bir polkovnıgi tilshiniń saýalyna jaýap berý kezinde ekinshi dúnıejúzilik soǵysqa 500-deı qazaq ofıtseri qatysqandyǵyn aıtty. Sol kezde jýrnalıst «bul kórsetkish tym az emes pe?» degen saýal qoıǵany esimde. Atap aıtqanda, sol ýaqytta polkovnıktiń qolynda naqty dáleldegen derekter bolmaǵandyqtan, ol osylaı jaýap berýge májbúr boldy. Sondyqtan bul 10 tomdyqty meniń tarapymnan Qazaqstan halqy úshin Uly Jeńistiń 70 jyldyǵynda syılyq dep baǵalaımyn», - dedi J.Dospanov.
