Ekinshi dúnıejúzilik soǵysta qaza tapqan sarbazdyń súıegi Oralda jerlendi
Qaıta jerleý rásiminde málim etilgenindeı, izdestirý is-sharalaryn júrgizý barysynda Lenıngrad oblysynyń Tosno aýdanyndaǵy batpaqty daladan qazaqstandyq eki jaýyngerdiń súıegi tabylǵan bolatyn.
Bir sarbazdyń soldat medalonynan múrde Dúzbaev Qalıdiki ekeni belgili boldy. Ekinshi jaýyngerdiń aty-jónin anyqtaý múmkin bolmady.
Osylaısha, Qalı Dúzbaevtyń súıegi týǵan jerine jetkizildi.
Oraldaǵy Jeńis alańynda BQO ákimdigi men QR Qorǵanys mınıstrligi «Atamnyn Amanaty» qoǵamdyq birlestiginiń qoldaýymen barlyq áskerı qurmet pen dinı dástúrlerdi saqtaı otyryp, qaıta jerleý rásimi ótkizildi.
Oǵan qatysqan qala ákimi Mırjan Satqanovtyń atap ótkenindeı, muny tarıhı kún dese de, artyq aıtqandyq emes.
«Jeńis jolynda janyn pıda etken Qalı Dúzbaevtyń súıegi Qazaqstannyń Máskeýdegi elshiliginde «Atamnyn Amanaty» qoǵamdyq birlestigine saltanatty túrde tapsyrylyp, Qorǵanys mınıstrliginiń kúshimen Oral qalasyna jetkizilip otyr. Jaýynger súıegin izdeý jumystaryna atsalysqan jandardyń bárine alǵysymyzdy bildiremiz. Biz árqashan ata-babamyzdyń erlik rýhyna taǵzym etip, Uly Jeńistiń keıingi urpaq úshin mán-mańyzy aıryqsha ekendigin esten shyǵarmaq emespiz, - dedi Mırjan Munaıdaruly.
Aıta keteıik, Qalı Dúzbaev 1902 jyly Batys Qazaqstan oblysynda dúnıege kelgen. Málimetterge qaraǵanda, ardagerdiń jubaıy soǵystan keıin Qazaqstanǵa oralyp, Terekti aýdany, Sotsıalızm aýylynda turǵan. Olardan 1939 jylǵy Mıhaıl esimdi uly qalǵan degen derek bar.
Bıyl Ekinshi dúnıejúzilik soǵystyń aıaqtalǵanyna 77 jyl toldy. Batys Qazaqstan oblysynan maıdanǵa 76 myń jaýynger attanyp, olardyń 36 myńy urys alańynda erlikpen qaza tapty.
