Ekinshi dúnıejúzilik soǵysqa qatysqan qazaqstandyqtarǵa qatysty qujattar tsıfrlandyrylady
«Qorǵanys mınıstrliginiń jergilikti áskerı basqarý organdarynda ekinshi dúnıejúzilik soǵys jyldarynda Qyzyl ásker qataryna shaqyrylǵan ofıtserlerdiń jeke isteri, áskerge eshelondarmen jóneltilgen komandalardyń ataýly tizimderi, qaza tapqandarǵa jáne habarsyz ketkenderge arnalǵan habarlandyrýlar saqtalýda. Qorǵanys mınıstrligi atalǵan qujattardy tsıfrlandyrýdy 2023 jyly qolǵa alýdy josparlap otyr», - dedi Úkimet basshysy jaýabynda.
Onyń atap ótýinshe, «Ulttyq arhıv qory jáne arhıvter týraly» Qazaqstan Respýblıkasynyń Zańyna jáne Ulttyq arhıv qorynyń qujattaryn saqtaý qaǵıdalaryna sáıkes arhıv qorlary arhıv uıymdarynda saqtalady jáne olardy qoǵamdyq uıymdarǵa ýaqytsha paıdalanýǵa berý qarastyrylmaǵan. Degenmen, Mádenıet jáne sport mınıstrligi, arhıv uıymdary bul salada jumys jasaıtyn qoǵamdyq uıymdarmen zańnamanyń aıasynda jumys jasaýǵa daıyn.
Sonmen qatar Mádenıet jáne sport mınıstrligi Reseıdiń Federaldyq arhıv qyzmetimen birlesip, «Qazaqstan ekinshi dúnıejúzilik soǵysy jyldarynda» atty qujattar jınaǵyn shyǵarýdy josparlap otyr.
«Bul jınaqqa Reseıdiń memlekettik arhıvterindegi Qazaqstanǵa qatysty qupııasyzdandyrylǵan 400-den astam arhıvtik qujattar engiziledi. Qazirgi ýaqytta Qazaqstan Respýblıkasy Ortalyq memlekettik arhıviniń qyzmetkerleri Reseı Qorǵanys mınıstrliginiń Ortalyq arhıvinde ekinshi dúnıejúzilik soǵysqa qatysqan qazaqstandyq jaýyngerlerdiń jeke isteri men qyzmettik tirkeý kartochkalaryn, sondaı-aq joǵary ofıtserlik quram jáne Qazaqstan aýmaǵynda qurylǵan áskerı bólimder týraly qujattardy zertteýde», - dedi Álıhan Smaıylov.
Sonymen qatar ekinshi dúnıejúzilik soǵys dáýirine jatatyn qundy qujattardy zertteý jáne olardy ǵylymı aınalymǵa engizý jumysy «Arhıv − 2025» jobasynyń aıasynda jalǵasatyn bolady.
