Ekinshi deńgeıli bankter usynyp otyrǵan nesıeler sharýalar úshin eshqandaı da tıimdi emes - N. Nyǵmatýlın
Buny túzetetin ýaqyt jetti. Búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda sóz sóılegen Májilis spıkeri Nurlan Nyǵmatýlın osylaı málimdedi.
Sóz arasynda spıker elimizdegi ekinshi deńgeıli bankterdiń aýyl sharýashylyǵy salasyndaǵy jobalardy kredıtteýge áli de qyzyǵýshylyq tanytpaı otyrǵanyn atap ótti.
«Sondyqtan da, dál osy aýyl sharýashylyǵy sektorynda ınvestıtsııalyq qyzmet emes, tek bıýdjettik qarjylandyrý ǵana basymdyq alyp otyrǵanyn atap ótkim keledi. Eger ekinshi deńgeıli bankter týraly aıtatyn bolsaq, onda olardyń agronerkásip keshenin qarjylandyrý boıynsha ustanymyn, onyń ishinde mal sharýashylyǵyn qarjylandyrýǵa qatysty kózqarasyn tek «syrttan baqylaýshy» dep ataýǵa ǵana keledi», - deıdi N. Nyǵmatýlın.
Osyǵan oraı palata tóraǵasy birqatar statıstıkalyq málimetterdi alǵa tartty. Onyń aıtýynsha, ekinshi deńgeıli bankterdiń barlyq berilgen nesıeleriniń tek úsh paıyzy ǵana aýyl sharýashylyǵyna tıesili eken. Onyń ishinde beriletin nesıeniń 95 paıyzyn iri jáne orta aýyl sharýashylyǵy taýarlaryn óndirýshi zańdy tulǵalarǵa berilse, kredıttiń tek 4 paıyzy sharýa jáne fermer qojalyqtaryna usynylǵan.
«Agroónerkásip kesheni halyqtyń udaıy tutynatyn ónimderdiń kózi bolyp tabylatynyn bankırlerdiń túsinetin ýaqyty jetti. Al ázirshe olar usynǵan kredıtter stavkasy qazaqstandyq fermerler úshin eshqandaı da tıimdi emes ekenin kórip otyrmyz. Bul jaǵdaıdy túzetetin kez de keldi dep sanaımyn», -dedi spıker.
