Ekinshi deńgeıli bankter nesıelendirý kólemin 7 paıyzǵa tómendetti - QR Ulttyq ekonomıka mınıstrligi
ASTANA. QazAqparat - Elimizdegi ekinshi deńgeıli bankter nesıelendirý kólemin 7 paıyzǵa tómendetti. Bul týraly búgin Aqordada Memleket basshysy Nursultan Nazarbaevtyń tóraǵalyǵymen ótip jatqan Úkimettiń keńeıtilgen otyrysynda bıyl 10 aıdaǵy elimizdiń áleýmettik-ekonomıkalyq damýynyń aldyn ala nátıjesin baıandaý kezinde QR Ulttyq ekonomıka mınıstri Erbolat Dosaev málim etti.
«Bıyl Jalpy ishki ónimniń baıaýlaýynyń negizgi faktorlarynyń biri ekonomıkanyń naqty sektoryn ekinshi deńgeıli banktermen nesıelendirý deńgeıiniń tómendeýi bolyp tabylady. Aǵymdaǵy jylǵy 9 aıynyń qorytyndysy boıynsha nesıelendirý kólemi 7,1 paıyzǵa tómendedi»,-dedi mınıstr.
Onyń sózine qaraǵanda, ekonomıka ósimin qamtamasyz etýdiń negizgi faktorlarynyń biri nesıelendirý kólemin arttyrýǵa baılanysty.
«Bizdiń esepteýler boıynsha nesıelendirý kólemin 1 paıyzǵa arttyrý Jalpy ishki ónimniń naqty ósimin 0,12 paıyzdyq pýnktke joǵarylatýǵa yqpal etedi. 2016 jyldaǵy josparlanǵan ósim qarqynyna qol jetkizý úshin naqty ekonomıkadaǵy nesıeler kólemi kem degende 15 paıyzǵa nemese 1,7 trln. teńgege ósýi kerek»,-dedi E. Dosaev.
