Ekinshi deńgeıli bankter qaryzdaryn keshirgen kezde jeke tabys salyǵynan bosatylady
ASTANA. QazAqparat - Ekinshi deńgeıli bankter halyqtyń áleýmettik álsiz toptarynyń qaryzdaryn keshirgen kezde jeke tabys salyǵynan bosatylady.
Bul týraly búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde QR Ulttyq ekonomıka mınıstri Erbolat Dosaev málim etti.
Zań jobasynda salyq saıasaty boıynsha birqatar túzetýler kózdelgen. Múgedek bolyp tabylatyn nemese aıqyn sebepterge baılanysty qıyn jaǵdaıǵa tap bolǵan halyqtyń áleýmettik álsiz toptary boıynsha problemaly bereshekterdi keshiretin mıkroqarjylyq uıymdardy jeke tabys salyǵynan bosatý kózdelgen.
Onyń sózine qaraǵanda, bul norma QR Ulttyq bankimen pysyqtalǵan.
«2015 jylǵy 1 qańtardan 2016 jylǵy 1 shildege deıin ekinshi deńgeıli bankter QR Ulttyq bankiniń 131 mlrd. teńge somasyndaǵy ıpotekalyq turǵyn úı qaryzdaryn qaıta qarjylandyrý baǵdarlamasynda kiretin bereshekti keshirý kezinde jeke tabys salyǵynan bosatý qamtylǵan. Bul norma ıpotekalyq qaryz alýshylardyń máselelerin sheshý jáne halyqtyń áleýmettik álsiz toptary sanatyna kómek kórsetý, sondaı-aq banktiń júıeni saýyqtyrý maqsatynda usynylyp otyr»,-dedi E. Dosaev.
