Ekibastuzǵa qarasty Báıet aýyly turǵyndarynyń shaǵymy: mektep tozǵan, mádenıet úıi tar

ASTANA. QazAqparat – Ekibastuzǵa qarasty Báıet aýylynyń mektebi tozǵan, mádenıet úıi talapqa saı emes. Aýyl turǵyndary óńirge jumys saparymen barǵan Ulttyq ekonomıka mınıstrine shaǵymdaryn jetkizdi. Bul týraly QazAqparat vedomstvonyń baspasóz qyzmetine silteme jasap habarlaıdy.

Mınıstrlikten málim etkendeı, aýyl turǵyndary jergilikti mekteptiń jaǵdaıyna shaǵymdanyp, 1987 jyly irgesi qalanǵan oqý ordasyna kúrdeli jóndeý jumystaryn júrgizýge járdemdesýdi surady. Báıet aýylynyń jalpy orta bilim beretin mektebine sońǵy ret kúrdeli jóndeý jumystary 2010 jyly júrgizilgen. Álibek Qýantyrov bilim berý mekemesiniń jaǵdaıyn jeke ózi tekserip, máseleni baqylaýǵa alýǵa ýáde berdi.

«Mektep ǵımaratyn kúrdeli jóndeý jobasyn qarjylandyrýdy 2023 jyly bıýdjetti naqtylaý kezinde qarastyrýǵa bolady», - dedi ol.

Sondaı-aq, aýyldyqtar jańa mádenıet úıin salý qajettiligin aıtty. Olar qazirgi nysan aýqymdy is-sharalar ótkizýge jáne aýyl turǵyndarynyń bos ýaqytyn uıymdastyrýǵa jaramaıtynyn jetkizdi. Esep boıynsha jobanyń quny – 315 mln teńge bolmaq.

Sonymen qatar, turǵyndar uzyndyǵy 2,5 km kentishilik joldardy jóndeý jáne kirme jolǵa ortasha jóndeý júrgizýdi surady. Jobalardyń jalpy quny – 156 mln teńge kóleminde eseptelgen.

Mınıstr Báıetti damý áleýeti bar aýyldar tizbesine engizý týraly másele qarastyrylyp jatqanyn atap ótti. Aıtýynsha, 2023 jyly Pavlodar oblysy boıynsha «Aýyl – el besigi» jobasy aıasynda kóshelerdi, áleýmettik, ınjenerlik, kólik ınfraqurylym obektilerin kúrdeli jáne ortasha jóndeýge 4,2 mlrd teńge qarastyrylǵan. Jobalar tizbesin jergilikti atqarýshy organdar qalyptastyrady.

Foto: .gov.kz