Ekibastuzdyń Pavlodar oblysynan shyǵarylýy: Internettegi aqparatqa ákimdik jaýap berdi

PAVLODAR. QazAqparat - Pavlodar oblysynyń ákimdigi Ekibastuz qalasynyń oblys aýmaǵynan shyǵarylatyny týraly áleýmettik jelide tarap, halyq arasynda qyzý talqylanyp jatqan aqparatqa qatysty túsinik berdi, dep habarlaıdy QazAqparat pavlodarnews.kz saıtyna silteme jasap.

«Ekibastuz qalasy Pavlodar oblysynyń qaramaǵynan shyǵyp, Kókshetaý qalasy shıpajaı aýmaǵynyń ortalyǵyna aınalady. Aqmola oblysynyń damýy úshin óndirisi men ınfraqurylymy damyǵan (avtoban, temirjol, memlekettik organdardy ornalastyrý úshin ǵımarattar, qyzmetkerlerge turǵyn úı) qala qajet.  Sondyqtan Ekibastuz bul talaptardyń barlyǵyna saı keletin qalalardyń biri retinde qarastyrylýda. Sondyqtan baspana men kommertsııalyq  orynjaı bolsa, satyp jiberýge asyqpańyz. Sebebi, baǵa 30 paıyzǵa deıin kóteriledi», - delingen WhatsApp jelisi arqyly tarap jatqan habarlamada.

Alaıda, Pavlodar oblysynyń ákimdigi bul aqparattyń jalǵan ekendigin aıtyp, beıtanys jáne kúmándi adamdardan keletin habarlamalarǵa sene bermeýge keńes berdi.

«WhatsApp habarlamasyndaǵy Ekibastuzdyń bólinýi týraly aqparattyń qısyny joq. Eger de bul jaǵdaı shynymen de solaı bolatyn bolsa, ákimdikter habardar bolýy tıis. Pavlodar oblysynan Ekibastuzdy shyǵarý boıynsha eshbir jumys júrgizilgen emes», - dedi oblys ákiminiń baspasóz hatshysy Azamat Baıtenov.